Алматы облысы әкімінің орынбасары Әсет Масабаев жол апатына ұшырады. Бұл ақпаратты облыстық полиция департаменті ресми түрде растады. Оқиға Төңкеріс–Байсерке автожолында орын алған,деп хабарлайды Todayinfo.
Облыстық полиция департаментінің хабарлауынша, жол-көлік оқиғасына байланысты қылмыстық іс қозғалып, тергеу жұмыстары басталған.
«Төңкеріс–Байсерке автожолында болған жол-көлік оқиғасы бойынша полиция қылмыстық іс тіркеп, тергеу жүргізіп жатыр», – делінген ресми мәлімдемеде.
Қазіргі таңда оқиғаның мән-жайы анықталуда. Әсет Масабаевтың жағдайы туралы нақты ақпарат әзірге таратылған жоқ.
Осыған байланысты полиция басқармасы жүргізушілерді жолда барынша мұқият болуға, әсіресе қараңғы уақытта және тас жолдарда жол ережесін қатаң сақтауға шақырды.
«Көлік жүргізу кезінде абай болу – тек өзіңіздің емес, өзгелердің де қауіпсіздігіне тікелей әсер етеді», – деді полиция өкілдері.
