Алматы тауларында туризм дамиды: Іле Алатау ұлттық паркінде «Бұтақты» визит-орталығы ашылды

Іле-Алатауы мемлекеттік ұлттық табиғи паркінің 30 жылдығына орай жаңа «Бұтақты» визит-орталығы салтанатты түрде ашылды. Бұл кешен – «Туранга Групп» компаниясы мен ұлттық парктің серіктестігі аясында салынған алтыншы орталық, деп хабарлайды Todayinfo ақпарат агенттігі. Жобаның ашылу салтанатына Орман шаруашылығы және жануарлар дүниесі комитетінің төрағасы Данияр Тұрғамбаев қатысты. Алматы қаласының әкімдігі де жобаға қолдау көрсетіп, аумаққа электр желілерін тартқан. Жаңа визит-орталықта заманауи дәретханалар, тамақтану орны, тимбилдинг пен шеберлік сабақтарын өткізуге арналған алаңдар бар. Сондай-ақ, келушілерге ұлттық парктің фирмалық кәдесыйларын сатып алу мүмкіндігі қарастырылған. Кешен аумағында танымал кәсіпкер және экобелсенді Сергей Спицын басқаратын «Бұтақты» кафесі жұмыс істейді. Компанияның бұл салаға салған жеке инвестициясының жалпы көлемі 8,5 млрд теңгеге жетті. Осы жобалардың арқасында 200 тұрақты жұмыс орны ашылса, оның 20-сы – «Бұтақты» орталығының үлесінде. Жаңа инфрақұрылымның арқасында ұлттық парктерге келушілер саны айтарлықтай өскен. Мысалы, Іле Алатауында туристер легі 2019 жылғы 300 мыңнан 2025 жылы 950 мыңға дейін (3 есе), ал Шарын шатқалында 50 мыңнан 250 мыңға дейін (5 есе) артады деп болжанып отыр. Алдағы уақытта Үлкен Алматы көлінде тағы бір заманауи визит-орталық салу жоспарланған. Оның жобасын Шотландиядағы Глазго қаласының бұрынғы бас сәулетшісі, әйгілі Рикардо Марини әзірлеген. Фото: Todayinfo.kz