Алматыда Екінші дүниежүзілік соғыста көзге түскен даңқты қолбасшы Бауыржан Момышұлының жақындарына Президент атынан жоғары мемлекеттік марапаттар тапсырылды, деп хабарлайды Todayinfo ақпарат агенттігі.
Мемлекеттік кеңесші Ерлан Қарин батырдың келіні, жазушы Зейнеп Ахметоваға және немересі Ержан Момышұлына "Алтын жұлдыз" айырым белгісі мен "Отан" орденін салтанатты түрде табыс етті.
Бұған дейін Мемлекет басшысы Қасым-Жомарт Тоқаев Бауыржан Момышұлына "Халық қаһарманы" атағын беру туралы шешім қабылдап, тиісті жарлыққа қол қойған. Осы шешімге сай марапат батырдың отбасына рәсім бойынша жеткізілді.
"Халқымыз Бауыржан Момышұлын әрдайым батыр деп біледі, қаһарман деп қастерлейді. Мемлекет басшысы Қасым-Жомарт Тоқаевтың бұл жолғы шешімі халықтың оған деген ыстық ықыласын одан әрі арттыра түсті. Ең бастысы, көптен күткен тарихи әділдік қалпына келтірілді", – деді мемлекеттік кеңесші Ерлан Қарин.
Кездесуде Бауыржан Момышұлының ерлігі мен өмір жолының ел жадындағы орны айтылып, оның мұрасы жас ұрпаққа үлгі екені атап өтілді. Сондай-ақ мемлекеттік марапаттың тапсырылуы батыр есіміне көрсетілген құрметтің айғағы ретінде бағаланды.
Фото: Ақорда
