Астанада Қазақстан халқы Ассамблеясының XXXIV сессиясы басталды

Астана қаласындағы Тәуелсіздік сарайында Қазақстан халқы Ассамблеясының (ҚХА) XXXIV сессиясының пленарлық отырысы өз жұмысын бастады. Сессияға Қазақстан Президенті Қасым-Жомарт Тоқаев қатысты. Іс-шара екі күнге жоспарланған,деп хабарлайды Todayinfo. Биылғы сессия «Бірлік пен келісім жолындағы 30 жыл» тақырыбымен өтуде. Бұл – еліміздегі этносаралық келісімді нығайту жолындағы тарихи жетістіктер мен алда тұрған міндеттерге арналмақ. Пленарлық отырысқа 1600-ден астам делегат қатысып жатыр. Олардың қатарында:

• Парламент депутаттары,
• Барлық өңірден келген ҚХА мүшелері,
• Республикалық және өңірлік этномәдени бірлестіктердің басшылары,
• Орталық және жергілікті атқарушы органдар өкілдері,
• Діни бірлестіктер мен саяси партиялардың өкілдері,
• Үкіметтік емес ұйымдар,
• Дипломатиялық корпус мүшелері,
• Ғылыми және шығармашылық интеллигенция,
• Қазақстандық және шетелдік БАҚ өкілдері бар.

Сессия қарсаңында Мемлекет басшысы Қасым-Жомарт Тоқаев ҚХА төрағасының жаңадан тағайындалған орынбасарлары – Дмитрий Останькович пен Расул Ахметовті қабылдады. Президент оларды жаңа қызметтерімен құттықтап, қоғамдық келісім мен ұлттық бірлікті нығайту жолындағы ҚХА-ның ерекше рөлін атап өтті.