Атырауда ер адам өртеніп жатқан балконға өрмелеп, өртті сөндіріп үлгерді

Атырау қаласындағы Alma City тұрғын үй кешенінде орын алған өрт оқиғасы қоғам назарын аудартты,деп хабарлайды Todayinfo  ақпарат порталы. Пәтерлердің бірінің балконында шыққан от жақын маңдағы тұрғындардың үрейін туғызғанымен, қайсар азаматтың батыл әрекеті тілсіз жаудың алдын алды.

Темір тіректермен өрмелеп, жалын шарпыған балконға жетті

Оқиға куәгерлері түсірген видеода белгісіз ер адамның ешқандай қауіпсіздік құралдарынсыз, бірнеше қабатты темір тіректермен жоғары өрмелеп, жалын шарпыған балконға жеткені анық көрінеді. Куәгерлердің айтуынша, ол оқиға орнына өрт сөндірушілер келгенге дейін жалынды ауыздықтап үлгерген.

Абырой болғанда, ешкім зардап шеккен жоқ

Қалалық төтенше жағдайлар қызметінің мәліметінше, өрт кезінде ешкім зардап шекпеген. Ер адам да жарақат алмаған. Қазіргі уақытта өрттің шығу себебі анықталып жатыр.

Құзырлы органдар тексеру жұмыстарын жүргізуде

Оқиғаның нақты мән-жайы мен өрттің шығу себебі жөнінде тиісті құзырлы органдар зерттеу жұмыстарын жүргізіп жатыр. Ал әлеуметтік желілерде ер адамның әрекеті ерлік пен адамгершіліктің үлгісі ретінде бағалануда.