Атырауда ер адамның денесі табылды: Мәйіт үйде үш апта жатып, иістеніп кеткен

Фото: pixabay.com Атырау қаласындағы Береке шағынауданында, №24 үйден ер адамның мәйіті табылды, деп хабарлайды Todayinfo.kz ақпарат агенттігі. Тұрғындар мәйіт пәтерде шамамен 21 күндей жатып қалғанын айтады. Ал оның қайтыс болғанын марқұмды туысы іздеп келгенде білген.  Көршілердің айтуынша, сол уақытта подъезді өлексенің иісі алып кетті, жағымсіз иіс әлі күнге дейін бар. Мәйіт табылғаннан кейін тұрғындар подъезді өздері тазалауға тырысқан. Бірақ мұнысынан түк шықпады.

“Иіс бүкіл подъезге тарады. Біз өз қаражатымызға адамдар жалдап, тазалаттық, хлоркамен, “белизнамен”, қолдан келгенше бәрімен жудық. Бірақ иіс бәрібір қалды. Біз маман емеспіз, мұны қалай дұрыс жасау керегін білмейміз”, — дейді көршілердің бірі.

Тұрғындардың сөзінше, оқиғадан кейін санитарлық-эпидемиологиялық қызметтер немесе арнайы ұйымдар оқиға орнына келмеген, ресми дезинфекция да жүргізілмеген. Осыған байланысты тұрғындар мұндай жағдайлардан кейін подъезд бен пәтерді санитарлық өңдеуге кім жауапты екенін анықтай алмай әлек.