«Бәйтерек» сыртқы нарықтан қаржы тартпақ

"Бәйтерек" ұлттық инвестициялық холдингі еурооблигациялар шығару арқылы 500 миллион доллар тартуды жоспарлап отыр, деп хабарлайды Todayinfo.kz ақпарат агенттігі. Бұл – қолданыстағы қарыз алу бағдарламасы аясындағы төртінші орналастыру. Облигациялар доллармен номинацияланады — әрқайсысы 1000 доллардан. Жалпы саны 500 мың бағалы қағаз шығару көзделген. Бұл — классикалық купондық облигациялар, яғни инвесторларға пайыздар тұрақты түрде төленіп отырады. Маңызды тұсы — облигациялар қамтамасыз етілмеген. Яғни қаржы холдингтің беделі мен қарызды қайтару қабілетіне деген сенім негізінде тартылады. Осылайша, холдингтің 2025 жылғы наурызда уәде еткен экономиканың нақты секторын несиелеуге арналған 8 триллион теңгені қайдан алатыны айқындала түседі.