Байғанин ауданында халық игілігіне бағытталған жаңа жобалар қолға алынды

Байғанин ауданының әкімі Айбек Көпенов Мемлекет басшысы бастамашы болған ұлттық жобалардың жүзеге асуы және облыс әкімінің халықпен кездесуде берген тапсырмаларының орындалуы туралы баяндады. Оның айтуынша, ауданда тұрғындардың тұрмыс сапасын арттыруға бағытталған бірқатар ауқымды жобалар қолға алынған, деп хабарлайды Todayinfo ақпараттық агенттігі.

Жол жөндеу және инфрақұрылым

2025 жылы аудандағы 83,3 шақырым жолды қамтитын 6 бағытта орташа жөндеу жұмыстары жүргізілуде. Бұдан бөлек, 9 ауылішілік көше мен аудандық маңызы бар жолдар жаңартылып, қайта салынуда. Жолдармен қатар, көше жарықтандыру жобалары қарқын алды: қазіргі таңда 202 дана шам орнатылды.

Әлеуметтік нысандар құрылысы

Қарауылкелді ауылында өрт сөндіру депосы, 400 орындық мәдениет үйі және 100 орындық кітапхана құрылысы басталды. Сондай-ақ, Ноғайтыдағы фельдшерлік-акушерлік пункт (ФАП), Оймауыт пен Дияр ауылдарындағы медициналық пунктер жаңартылып, пайдалануға берілді. Аудандық спорт мектебі, Дияр ауылындағы спорт залы және Қопа ауылындағы парк те қайта жаңғыртудан өтті.

Су және газ инфрақұрылымы

Баршақұм ауылында 7 430 метр су құбыры желісі тартылып жатыр. Қазіргі таңда аудан тұрғындарының 83,5%-ы көгілдір отынмен қамтылған. Сонымен қатар, Қаражар, Оймауыт және Қораши ауылдарында газ тарту жұмыстары жүріп жатыр. Қосымша 10 елді мекенді газдандыру жобасы жоспарда тұр.

Демеушілікпен жүзеге асқан жобалар

Жергілікті демеушілердің қолдауымен Қопа ауылында саябақ абаттандырылып, ескерткіш орнатылды. Дияр мен Көлтабандағы әлеуметтік нысандар да қолдауға ие болды. Әкім Айбек Көпеновтің айтуынша, бұл жобалар – ауылдық инфрақұрылымды дамытуға, тұрғындардың тұрмыс сапасын жақсартуға және заманауи әлеуметтік орта қалыптастыруға бағытталған нақты қадамдар болып отыр.