Павлодар облыстық мәслихатының депутаты Рүстем Мазғұтовқа тиесілі компанияның тасы өрге домалап тұр. Солтүстік өңірдегі жол жөндеу жұмыстарымен айналысатын кәсіпорын бір жылдың ішінде таза табысын екі есеге ұлғайтқан. Бұл туралы компанияның қаржылық есептілігінде айтылды. Бұл туралы Todayinfo порталы Курсив басылымына сілтеме жасап хабарлайды.
Ресми деректерге сүйенсек, "Павлодаржолдары" ЖШС 2024 жылды 569 миллион теңге таза пайдамен аяқтады. Салыстыру үшін айтсақ, 2023 жылы бұл көрсеткіш 286,9 млн теңге болған еді.
Ұлттық банк бекіткен бағаммен (1 доллар – 504,49 теңге) есептегенде, компанияның таза пайдасы 1,1 миллион доллардан асады. Ал кәсіпорынның жалпы кірісі (выручка) 5,5 миллиардтан 7,2 миллиард теңгеге дейін өскен.
Қалтаға түскен дивиденд
Компанияның жалғыз иесі әрі бас директоры – Май ауданында тіркелген кәсіпкер және депутат Рүстем Мазғұтов. Табысты жылдың қорытындысы бойынша ол 273 миллион теңге дивиденд алған.
Бұл былтырғы жылмен салыстырғанда әлдеқайда көп: 2023 жылы құрылтайшыға төленген дивиденд мөлшері 93,3 млн теңге болған еді. Қазіргі уақытта компанияның бөлінбеген пайдасы 2,1 млрд теңгені құрап отыр.
Қарыздар және жаңа жоспарлар
Қаржылық құжаттарда қызықты мәліметтер бар. Жыл соңындағы есеп бойынша, тапсырыс берушілер "Павлодаржолдарына" 41,9 млн теңге қарыз болып шыққан. Оның басым бөлігі, яғни 36,1 млн теңгесі ұлттық оператор – "ҚазАвтоЖол" компаниясының мойнында.
Бір қызығы, депутаттың фирмасының өзі де жұмысшылар алдындағы жалақы бойынша 17,6 млн теңге берешегімен жылды аяқтаған. Алайда аудиторлық тексеріс бұл қарыздың 2025 жылдың 10 қаңтарында толық өтелгенін растады.
Компания тек жол жөндеумен шектелмек емес. Қараша айының соңында олар Павлодар облысы Май ауданындағы Ақшиман кен орнынан құрылыс тасы мен саз балшық (суглинка) өндіруді бастайтынын жариялады. Жоспар бойынша, 2026 жылы 24 мың текше метр шикізат өндірілмек. Бұл материалдар жол құрылысына пайдаланылады.
