Екатеринбургте тағы екі әзербайжан азаматы қамауға алынды

2025 жылғы 27 маусымда Екатеринбург қаласының Ленин аудандық соты Ресей құқық қорғау органдарының арнайы операциясы барысында ұсталған Азизов Аббас Азай оғлына қатысты бұлтартпау шарасын таңдады, деп хабарлайды Todayinfo. Агенттік АПА-ның хабарлауынша, тергеу органының өтініші негізінде сот А. Азизовты 2025 жылғы 19 шілдеге дейін қамауға алу туралы шешім қабылдады. Осылайша, Екатеринбургте түрлі себептермен ұсталып, қамауға алынған әзербайжан азаматтарының жалпы саны сегізге жетті. Сол күні тағы бір әзербайжан азаматы — Кямал Гадимали оғлы Сафаров та Ленин аудандық сотының шешімімен қамауға алынды. Бұл туралы ресейлік «Газета.Ру» басылымы соттың баспасөз қызметіне сілтеме жасап хабарлады. Ресми мәліметке сәйкес, тергеу тарапының өтінішін қанағаттандырған сот Сафаровты да 2025 жылғы 19 шілдеге дейін қамауға алу туралы үкім шығарды.