Елордада қалалық ортаны жақсартуға бағытталған ауқымды абаттандыру жұмыстары басталды. Бұл туралы қала әкімі Жеңіс Қасымбек мәлімдеді, деп хабарлайды Todayinfo.kz ақпарат агенттігі.
Қала басшысының айтуынша, қазіргі таңда Астанада қоғамдық кеңістіктерді жүйелі түрде жаңарту мен дамыту жұмыстары қарқынды жүргізілуде. Атап айтқанда, саябақтар, гүлзарлар, желекжолдар мен аулалар кезең-кезеңімен абаттандырылып жатыр. Соңғы жылдары елордада шамамен 500-ге жуық қоғамдық және аула кеңістігі жаңартылған.
Абаттандыру барысында көгалдандыру мәселесіне ерекше назар аударылуда. Қаланың экологиялық ахуалын жақсарту, тұрғындарға жайлы орта қалыптастыру және демалыс аймақтарын көбейту негізгі басымдықтардың бірі болып отыр.
Қазіргі уақытта «Мыңжылдық» аллеясы аумағында бірден үш ірі нысанда жұмыс басталады. Олар — Қуанышбаев атындағы театр алдындағы гүлзар, теміржол вокзалы маңындағы парк және «Нұрлы жол» вокзалы аумағы. Бұл жобалар ұзындығы 4 шақырымнан асатын ірі желілік саябақ қалыптастырудың алғашқы кезеңі саналады. Болашақта бұл аймақтар қаланың негізгі нысандарын біріктіретін біртұтас жаяу жүргіншілер кеңістігіне айналмақ.
Сонымен қатар Greenline жаяу жүргіншілер желекжолының екінші кезеңі бойынша да жұмыстар жалғасуда. Бұл аумақ Төле би көшесінен Әнет баба көшесіне дейін, сондай-ақ Күлтегін көшесінен Айтматов көшесіне дейінгі аралықты қамтиды. Жоба аясында ойын және спорт алаңдары, су тоғандары және түрлі демалыс орындары қарастырылған.
Абаттандыру жұмыстары тек демалыс аймақтарымен шектелмейді. Қаланың негізгі магистральдары да жаңғыртылуда. Атап айтқанда, Қалдаяқов, Кенесары көшелері, сондай-ақ Мәңгілік Ел, Қабанбай батыр, Момышұлы және Ұлы Дала даңғылдары қамтылған. Бұл жерлерде жаяу жүргіншілерге арналған қолайлы орта қалыптастыру, көгалдандыру және заманауи инфрақұрылым жасауға басымдық берілуде.
Сондай-ақ Есіл өзені бойымен үздіксіз жаяу жүргіншілер бағытын қалыптастыру жұмыстары жалғасуда. Бұдан бөлек, «Бейбітшілік және келісім» саябағын жаңа Конгресс-орталық бағытына қарай кеңейту, «Қалалық романс» саябағын абаттандыру жұмыстары жүргізіліп жатыр. Ал Кіші Талдыкөл аумағында жаңа эко-саябақ салу жоспарланған.
Қала аумағындағы шағын қоғамдық кеңістіктер де назардан тыс қалмайды. «Тұлпар» сауда үйі маңындағы, №119 мектеп жанындағы, Пушкин көшесіндегі, сондай-ақ Сәтбаев көшесі мен Момышұлы даңғылы қиылысындағы гүлзарлар жаңартылатын болады. Сонымен қатар Құдайбердіұлы көшесі, Қошқарбаев даңғылы және басқа да бірқатар аумақтар абаттандыру жұмыстарына енгізілген.
Жалпы алғанда, бұл бастамалар елорданың барлық аудандарын қамтып, тұрғындарға жайлы әрі қауіпсіз орта қалыптастыруға бағытталған. Қала әкімдігі алдағы уақытта да абаттандыру жұмыстарын жүйелі түрде жалғастырып, Астананы заманауи әрі өмір сүруге қолайлы мегаполиске айналдыруды көздеп отыр.
