Енді білім беруде бюджет қаржысын жымқыруға жол берілмейді – Антикор

Сыбайлас жемқорлыққа қарсы іс-қимыл агенттігі білім беру саласында бюджет қаржысын жымқыруға жол бермеу үшін саланы цифрландырып жатыр.  Жемқорлық тәуекеліне жүргізілген сыртқы талдау барысында бюджет қаражатын жоспарлау және игеру кезеңінде педагогтердің еңбегіне ақы төлеу қорынан бюджет қаражатын жымқыру схемалары анықталды. Бюджеттік өтінімдерді қалыптастыру процестерін автоматтандырудың, заңбұзушылықтарды бақылау және алдын алу тетіктерінің, сондай-ақ ақпараттық жүйелердің біркелкі болмауына байланысты көптеген дерек мүмкін болған. Сыбайлас жемқорлықтың себебі мен жағдайын жою үшін білім, қаржы және цифрлық даму министрліктерімен бірлесіп, жол картасы іске асырылып жатыр.

• • «Бухгалтерлік операциялардың бірыңғай қоймасы» жобасы енгізілді. Ұлттық білім беру базасында мемлекеттік органдармен интеграцияланған «Педагог портфолиосы» электронды модулі әзірленді.
  • Сондай-ақ сатып алынатын бухгалтерлік есеп жүйелеріне бірыңғай техникалық талаптар көзделген, тәуекелдерді басқару жүйелері және тағы басқасы енгізілді.
  • Іске асырылған цифрлық шешімдердің арқасында өңірлік басқармалар мен білім бөлімдері ай сайын бухгалтерлік есеп және қазынашылық жүйелерінің есебін салыстырып отырады.
  • Бұдан басқа, мемлекеттік аудит органдары тарапынан жалақыны көтерумен бірге дербес және банктік деректерді бұрмалаумен ұштасқан педагогтердің еңбекақы төлеу қорынан күдікті төлемдердің қашықтан мониторингі енгізілді. Қазір әрбір төлем операциясы өзінің электронды ізін қалдырады, бұл жымқыруды аналитикалық жолмен анықтауға мүмкіндік береді.

Сондай-ақ биыл агенттіктің бастамасы бойынша бюджеттік процестерді автоматтандыруға, қазынашылық жүйесін білім беру ұйымдарының бухгалтерлік есеп жүйелерімен интеграциялауға, төлем құжаттарына қол қою кезінде биометрияны енгізуге бағытталған цифрлық шешімдер енгізілді. Бұл шаралар қаражаттың жұмсалуына тиімді бақылау орнатуға мүмкіндік береді. Жоба енгізілгенге дейін былтырғы істер бойынша Антикор анықтаған залал млрд-таған сомамен (17,3 млрд теңге) өлшенсе, биыл жымқыру айтарлықтай азайтылды (7,3 млн теңге). Қазір агенттік білім беру мекемелерінің қызметкерлері арасында қаржылық заңбұзушылықты болдырмау үшін түсіндіру жұмысын жүргізіп жатыр.