Ер есімі ел есінде: Жетісуда «Жас сақшы» сыныбы ашылды

Ескелді ауданындағы Жетісу ауылында қызметтік міндетін атқару кезінде қаза болған әділет прапорщигі Ербол Төлеубекұлы Ержановтың есімі берілген «Жас сақшы» сыныбы өз жұмысын бастады. Бұл сынып Алматы және Жетісу облыстары бойынша қылмыстық-атқару жүйесі департаментінің бастамасымен ашылды, деп хабарлайды Todayinfo.  Бүгін жетінші сынып оқушылары кадеттер қатарына қабылданып, «Жас сақшы» деп аталатын жас қылмыстық-атқару жүйесі қызметкерлері сыныбының алғашқы мүшелері атанды. Сыныптың мақсаты — балаларға әскери-патриоттық тәрбие беру, кәсіби бағдарларын анықтауға көмектесу және болашақ мамандық таңдауда қолдау көрсету. Кадеттер үшін арнайы киім тігіліп, сынып бөлмесі заманауи стендтер мен жабдықтармен қамтамасыз етілген. Әкімдік пен мектеп өкілдері оқушылардың болашағына сенім білдіріп, оларды дұрыс жолда жүрген ел азаматтары ретінде тәрбиелеуге шақырды. Ербол Ержановтың есімі жас ұрпаққа патриоттық пен азаматтық борышты үлгі ретінде көрсетілмек. Сыныпқа қатысқан балалар болашақта құқықтық тәртіпті сақтау жолында өз үлестерін қосатынына сенім мол.