«Еркексіз әйел ешкім емес»: Назгүл Қарабалинаның сөзі желіде дау тудырды (ВИДЕО)

Әлеуметтік желілерде кеңінен тарап кеткен үзінді видео актриса Назгүл Қарабалинаның үш жыл бұрын берген сұхбатынан алынғаны белгілі болды. Бұл сұхбат «Менің өмірім» бағдарламасында айтылған,деп хабарлайды Todayinfo ақпарат порталы. Сұхбат барысында Назгүл Қарабалина қазақ әйелдерінің ер адамсыз толыққанды адам бола алмайтынын мәлімдеген.

«Мен ер азаматсыз үйтем, бүйтем деген оттаған дүние. Солай болғысы келіп жүргендер өкіндіреді. Бола алмайды. Жеме-жемге келгенде ер азаматсыз ешқайсысы ештеңе жасай алмайды. Бірақ солай болғысы келетіндер мені қынжылтады. Мен қазақ әйелдерін айтып отырмын. Орыстарда, басқа ұлтта шатағым жоқ. Ер азаматсыз қайбір қазақ әйелі алға басып, би, дені дұрыс адам бола алмайды. Бұл — менің тұжырымым. Мен өз сөзіме жауап беремін», — дейді актриса.

Өнер иесінің бұл пікірі желіде қызу талқыланып, көпшіліктің наразылығын тудырды. Кейбір қолданушылар: "Бұдан кейін бұл кісіге микрофон бермеңдер. Қазақ әйелі болсын, басқа ұлттың әйелі болсын, еркексіз де мықты адам бола алады", "Әйел еркексіз ешкім емес дейтіндей сен кімсің, Құдайсың ба? Абайлап сөйле", "Осы да өнер адамы ма? Мәдениет, білім қайда?" "Оттаған әңгіме айтып отыр" — деген пікірлерін қалдырған.