Германия соты экс-көлік прокуроры Мақсат Дүйсеновті Қазақстанға бермейтін болды

Германия соты Қазақстанның бұрынғы көлік прокуроры Мақсат Дүйсеновті елге экстрадициялау туралы өтінішті қабылдамай, оны қамаудан босату жөнінде шешім шығарды. Неміс тарапы қылмыстық қудалау саяси себептермен жүргізілуі мүмкін деген уәжді негізге алып, Қазақстанның талабын жарамсыз деп таныған. Дүйсенов Германиядан саяси баспана сұраған. Қазақстанда ол аса ірі көлемде пара алды, алаяқтық жасады және заңсыз табысты заңдастырды деген күдікке ілінген. Тергеу мәліметінше, бұрынғы прокурор шамамен 22 миллион доллар көлемінде пара алды деп айыпталуда. Қорғаушылар бұл істің саяси сипат алғанын, тергеу кезінде әкімшілік әрі сыртқы қысым болғанын айтқан. Германия соты шешім қабылдағанда осы жайттарды да ескергені хабарланды. Бұған дейін Дүйсенов Қазақстанда іздеуде болып, Интерпол арқылы Германияда ұсталған еді. Алайда саяси баспана рәсімінің басталуы экстрадиция процесін тоқтатқан. Айта кетейік, ол Қайрат Қожамжаров құқық қорғау органдарын басқарған кезеңде оның жақын серіктерінің бірі болып, бірнеше ықпалды қызмет атқарған. Қожамжаров Сенатқа ауысқаннан кейін Дүйсенов те мемлекеттік қызметтен кеткен. Қазіргі таңда Қазақстан тарапы Германияға қайтадан экстрадициялық сұрау жолдай ма, жоқ па – белгісіз. Фото:azh.kz