Хазірет ауылына көгілдір отын жетті

Ақтөбе облысының Мәртөк ауданына қарасты Хазірет ауылында көптен күткен көгілдір отын іске қосылды, деп хабарлайды Todayinfo ақпараттық агенттігі. Хазірет ауылдық округі облыс орталығынан 70 шақырым, аудан орталығынан 150 шақырым жерде орналасқан. Аумағы 45 мың гектардан астам аумақты қамтитын округке Хазірет ауылы мен 10 шақырым қашықтықтағы Жездібай елді мекені кіреді. Бүгінде мұнда 118 үй, 376 тұрғын бар. Жоба аясында «Алихан ойл З» ЖШС мердігер компаниясы 47,8 шақырымдық жеткізуші және ауылішілік газ желісін салды. Жобаның ұйымдастырушысы – Ақтөбе облысының энергетика және тұрғын үй-коммуналдық шаруашылығы басқармасы. Газ жүйесін іске қосу рәсіміне аудан әкімі Медет Ысқақов, ауыл ақсақалдары мен жергілікті тұрғындар қатысып, тарихи сәттің куәсі болды. Жергілікті халықтың пікірінше, көгілдір отынның келуі тұрғындардың тұрмыс сапасын жақсартып қана қоймай, ауылдың әлеуметтік-экономикалық дамуына серпін береді.