Қазақстандық шоу-бизнес өкілдері — продюсер Баян Мақсатқызы (Алагөзова) мен әнші Меруерт Түсіпбаева арасында мәдениет пен тіл мәселесіне қатысты ашық пікірталас өрбіді. Әлеуметтік желілерде қызу талқыланып жатқан бұл тақырып ұлттық құндылықтарға деген көзқарасты ортаға салып отыр,деп хабарлайды Todayinfo ақпараттық агенттігі.
Меруерт Түсіпбаева: «Мәдени жобаларға кәсіби мамандар қажет»
Әнші Меруерт Түсіпбаева продюсердің тарихи маңызы бар жобаларды қолға алуын сынға алды. Оның айтуынша, Баян Алагөзова қазақ тілін жетік меңгермеген, әрі ұлттық дәстүр мен мәдениетті терең түсінбейтін адам ретінде мұндай жауапты жобаларға жетекшілік етуге лайық емес.
«Қыз Жібек», «Қозы Көрпеш – Баян сұлу» сияқты ұлттық классикаларды түсіруге тіл мен дәстүрді шын түсінетін кәсіби мамандар тартылуы тиіс», – деді Түсіпбаева.
Баян Алагөзова: «Дарынсыз адамның талабы көп»
Продюсер Баян Алагөзова Instagram парақшасында өзіне бағытталған сынға қысқа әрі өткір жауап берді:
«Адам неғұрлым дарынсыз болса, соғұрлым оның талаптары көп болады», – деп жазды ол.
Осылайша, продюсер өз ұстанымынан қайтпайтынын аңғартты. Бұл пікірталас желі қолданушылары арасында түрлі көзқарас тудырып, мәдениет саласындағы мамандық пен жауапкершілік туралы қоғамда кең талқыға себеп болды.
