Павлодар облысында Ертіс өзенінің үстінен өтетін ұзындығы 691 метрлік жаңа алып көпірдің құрылысы қарқынды жүргізілуде. Қазіргі таңда жұмыстың 50 пайызы аяқталып, алты тірек бағанының төртеуі орнатылды, деп хабарлайды Todayinfo ақпараттық агенттігі.
Бұл — елімізде отандық инженерлер мен мамандардың күшімен салынып жатқан алғашқы экстрадозды көпір. Тағы бір ерекшелігі – құрылыста тек қазақстандық материалдар қолданылады. Сапаны үнемі бақылап отыру мақсатында құрылыс алаңына арнайы жылжымалы зертхана орналастырылған.
«Жол активтерінің ұлттық сапа орталығы» Павлодар филиалының директоры Ақылбек Қабылдиннің айтуынша, жобаның стратегиялық маңызы зор, және әр кезеңде сапа мұқият тексеріліп отыр. Алынған сынамалар жақсы нәтиже көрсетіп келеді.
Көпір төрт жолақты болады және 60 жылдан астам пайдаланылып келе жатқан ескі көпірдің жанына салынуда. Бұл жаңа өткел көлік қозғалысын реттеп, су көлігінің қатынасын жақсартуға және жол қауіпсіздігін арттыруға бағытталған. Құрылысты белгіленген мерзімнен ертерек аяқтау жоспарда бар.
Айта кету керек, бұл — техникалық жағынан өте күрделі құрылыс. Тірек аралығындағы жайпақ жолды бетондау кезінде теңдестірілген құйма жүйесі қолданылады. Жаңа көпір 2026 жылы толық іске қосылып, көлік қозғалысы ашылады деп жоспарлануда.
