Діни мазмұндағы материал таратты деген айыппен әкімшілік құқықбұзушылық туралы іс алдымен полиция тарапынан қозғалып, кейін материалдар сотқа жіберілді. Бұл туралы Todayinfo.kz ақпараттық порталы хабарлайды.
Жақында Петропавл қаласының мамандандырылған әкімшілік құқықбұзушылықтар жөніндегі соты журналист әрі қалалық мәслихат депутаты Руфия Мұстафинаға Қазақстан Республикасының «Діни қызмет және діни бірлестіктер туралы» заңнамасын бұзды деген бап бойынша 153 мың 150 теңге (50 АЕК) мөлшерінде айыппұл салу туралы шешім шығарды.
«Мені діни мазмұндағы материал таратқаны үшін айыппұлға тартты. Судья менің басылымның сайты мен әлеуметтік желілерінде жариялаған бас имаммен сұхбатымды діни материал деп таныды. Сұхбатта бас имам Құрбан айт мерекесі туралы, оның дәстүрлері жайлы айтып берген. Оның үстіне менің қолымда екі сараптама қорытындысы бар, оларда бұл сұхбатты таратуға ешқандай кедергі жоқ екені көрсетілген», – деді Руфия Мұстафина Sputnik Қазақстанға.
Оның айтуынша, екінші сот отырысына Дін істері басқармасының маманы шақырылып, сотта мұндай материалдарды тарату үшін имамнан арнайы рұқсат алу қажет екенін түсіндірген.
«Бірақ менің жағдайымда ол сұхбатты имамның өзі берді ғой. Оның үстіне шілде айында жарияланған сұхбатқа ешкім қарсылық білдірген жоқ. Тіпті бұл материалды қалалық ішкі саясат бөлімінің басшысы мен қала әкімінің баспасөз қызметі де бөлісті», – деп таңданысын білдірді журналист.
Ол бұл шешімге апелляциялық шағым түсіретінін, сондай-ақ судьяға қатысты да шағым жазатынын айтты. Себебі істің қаншалықты әділ қаралғанына күмәні бар.
«Сот жүйесі өте күрделі, қарапайым адамдарға оны түсіну қиын. Ал егер нормалар, ережелер мен регламенттер нақты жазылмаса, “діни материал тарату” деген ұғымды оңай манипуляциялауға болады. Дін істері басқармасына да көптеген сұрақ бар. Неге имамның түсіндірмесі діни материал болып саналады? Онда мектеп оқушылары неге дінтану пәнін оқиды?» – деді Руфия Мұстафина.
Айта кетейік, облыстық полиция департаментінің экстремизмге қарсы іс-қимыл басқармасының басшысы Руслан Жарасбаев қазан айының соңында жыл басынан бері өңірде діни материалдарды заңсыз таратудың 22 дерегі анықталғанын хабарлаған болатын.
«Еске саламыз: мұндай материалдарды тек ғибадат орындарында және діни білім беру ұйымдарында ғана таратуға болады. Кәсіпкерлер мұндай материалдарды тарату үшін жергілікті атқарушы органдардан рұқсат алуы қажет. Сондай-ақ дін мәселесінде тек ресми ақпарат көздеріне сенуге, Қазақстан заңнамасын білуге және сақтауға шақырамыз», – деген еді Руслан Жарасбаев.
Әрине, бұл сот ісінен кейін көптеген журналистер діни мерекелер туралы немесе дінге қатысты өзге ақпараттарды дайындау кезінде алаңдауы мүмкін.
«Депутат ретінде мен бұл мәселені анықтап алуым керек. Белгілі болғандай, осы бап бойынша тағы 22 адам айыппұл төлеген. Менің ойымша, бұл – абсурд. Қазақстандықтар мұндай жағдайға тап болмауы үшін, олардың құқықтарын қорғау үшін бұл істі қоғам талқысына шығарғым келеді. Біз заңға қайшы нәрсені насихаттап жатқан жоқпыз», – деп қорытындылады Руфия Мұстафина.
