Қазақстандық бокс жұлдызы Жәнібек Әлімханұлы мансабындағы ең маңызды жекпе-жекке дайын. Орта салмақтағы WBO және IBF белбеулерінің иегері жақында рингке шығады. Бұл жай ғана айқас емес, чемпиондық атақтарды біріктіретін тарихи сәт болмақ. Бұл туралы Todayinfo порталы жазды.
Қазақстандық былғары қолғап шебері (17-0, 12 KO) 6 желтоқсан күні АҚШ-та шаршы алаңға көтеріледі. Бұл жолғы қарсылас осал емес.
Жәнібек WBA тұжырымы бойынша әлем чемпионы, тәжірибелі кубалық Эрисланди Ларамен (31-3-3, 19 KO) қолғап түйістіреді.
Үш белбеу бір қолда: Жеңімпаз бәрін алады
Бокс әлемі бұл кездесуді асыға күтуде. Себебі жеңімпаз WBA, IBF және WBO нұсқалары бойынша чемпиондық белбеулерді біріктіріп, орта салмақтың сөзсіз көшбасшысы атанады.
Жәнібек үшін бұл – әлемдік аренадағы орнын біржола бекітуге берілген зор мүмкіндік. Қос мықтының текетіресі жанкүйерлерге нағыз адреналин сыйлайтыны анық.
"Қазақ стилін мойындататын кез келді"
Жекпе-жек алдында "Qazaq Style" өзінің жанкүйерлеріне және қарсыласына арнап маңызды үндеу жасады. Ол әуесқой бокста жинаған тәжірибесінің мол екенін, енді кәсіпқой рингте өз сөзін айтатын сәт туғанын жеткізді.
"Мен әуесқой бокста Азия чемпионатына, Әлем біріншілігіне және Олимпиадаға қатысып, жер шарының барлық түкпірін араладым. Енді өзімді, ерекше қазақ стилін күллі әлемге паш ететін уақыт келді", – деп мәлімдеді Жәнібек Әлімханұлы.
Бұл айқас қазақ бокс мектебінің деңгейін тағы бір мәрте дәлелдеуге мүмкіндік береді.
