Қазіргі таңда әлем елдерінің қорғаныс қабілеті тек әскери техника мен қару-жарақтың қуатымен ғана емес, цифрлық технологияларды тиімді қолдану деңгейімен де бағаланады. Жасанды интеллект, робототехника, ұшқышсыз жүйелер және киберқауіпсіздік мемлекеттердің қорғаныс әлеуетін айқындайтын негізгі факторлардың біріне айналды. Бұл бағытта Қазақстан Республикасы Қорғаныс министрлігі де заман талабына сай жүйелі жұмыстар жүргізіп, әскери басқару жүйесіне озық технологияларды енгізуге басымдық беріп келеді, деп жазады Todayinfo.kz.
Қорғаныс министрлігі жүзеге асырып жатқан SARBAZ+ және Defence Tech жобалары – осы бағыттағы маңызды бастамалардың бірі. Аталған жобалар мемлекеттік органдарды, IT-компанияларды, ғылыми-зерттеу ұйымдарын, жоғары оқу орындарын және стартаптарды бір арнаға тоғыстырып, қорғаныс технологияларының ұлттық экожүйесін қалыптастыруды көздейді. Мұндай ынтымақтастық ғылыми жаңалықтардың тәжірибеде тиімді қолданылуына және қорғаныс саласындағы инновациялардың дамуына жол ашады.
Жобалардың негізгі басымдықтарына жасанды интеллект технологиялары, ұшқышсыз ұшу аппараттары, робототехника, әскери бейнеталдау, цифрлық платформалар және киберқауіпсіздік кіреді. Бұл бағыттар әскери шешім қабылдау процесін жеделдетуге, ақпаратты дәл әрі жылдам өңдеуге, сондай-ақ әскери бөлімдердің тиімділігін арттыруға мүмкіндік береді.
Бүгінде киберқауіпсіздік ұлттық қауіпсіздіктің ажырамас бөлігіне айналды. Ақпараттық жүйелерді қорғау, цифрлық инфрақұрылымның тұрақты жұмысын қамтамасыз ету және кибершабуылдардың алдын алу – мемлекет алдындағы маңызды міндеттердің бірі. Осыған байланысты Қорғаныс министрлігі ақпараттық қауіпсіздік саласындағы кәсіби мамандарды даярлауға ерекше көңіл бөлуде.
«Ақпараттық қауіпсіздік саласындағы мамандарды даярлауға ерекше көңіл бөлінуде. Әскери қызметшілер деректерді қорғау және ақпараттық қауіпсіздікті талдау бағыттары бойынша оқытылып, халықаралық сертификаттар алу мүмкіндігіне ие. Сондай-ақ, SHAIQAS 2026 чемпионаты киберқауіпсіздік, робототехника және ұшқышсыз жүйелер салаларындағы таланттарды анықтап, отандық технологияларды дамытуға ықпал етеді. Бұл бастамалар Қарулы Күштердің тиімділігін арттыруға және еліміздің ұлттық қауіпсіздігін нығайтуға бағытталған», – деді Қазақстан Республикасы Қорғаныс министрлігінің Ақпараттық технологиялар департаментінің бастығы Б. Мырзағалиев.
Әскери қызметшілер деректерді қорғау, ақпараттық қауіпсіздікті талдау және киберқауіптерге қарсы іс-қимыл бағыттары бойынша арнайы даярлықтан өтеді. Сонымен қатар, олардың халықаралық деңгейде мойындалған кәсіби сертификаттарды алуына жағдай жасалып отыр. Бұл қазақстандық әскери мамандардың кәсіби біліктілігін арттырып қана қоймай, әлемдік тәжірибені игеруіне де мүмкіндік береді.
Инновациялық экожүйені дамытуда талантты жастардың рөлі ерекше. Осы мақсатта ұйымдастырылатын SHAIQAS 2026 чемпионаты киберқауіпсіздік, робототехника және ұшқышсыз жүйелер салаларындағы дарынды жастарды анықтап, олардың тың идеяларын қолдауға бағытталған. Чемпионат жас мамандардың әлеуетін ашып қана қоймай, отандық технологиялық жобалардың дамуына және қорғаныс саласына жаңа шешімдердің енгізілуіне серпін береді.
Қазақстан Республикасы Қорғаныс министрлігінің Ақпараттық технологиялар департаментінің бастығы Б. Мырзағалиевтің айтуынша, бұл бастамалардың түпкі мақсаты – Қарулы Күштердің жауынгерлік қабілетін арттырумен қатар, инновациялық әлеуетін күшейту және ұлттық қауіпсіздікті заманауи цифрлық технологиялар арқылы нығайту.
