Сағатына 200 шақырым жылдамдықта болған: Лондонда ұшақ апатқа ұшырады (ВИДЕО)

Әуе кемесі жергілікті уақыт бойынша 15:45-те ұшуға тиіс болған. Мақсатты бағыты – Нидерландтағы Лелистад қаласы. Алайда ұшақ ұшу жолағынан көтерілгеннен кейін шамамен 5 метр биіктікке ғана жетіп, кенеттен жерге құлаған. Flightradar сервисінің мәліметінше, ұшақтың жылдамдығы ұшу сәтінде шамамен 200 км/сағ болған. The Daily Mail басылымы хабарлағандай, қазіргі таңда ұшақ бортында қанша адамның болғаны туралы нақты ақпарат жоқ. Жергілікті Эссекс полициясы оқиға фактісін растады. Құтқару және төтенше жағдайлар қызметтері апат орнына дереу жетіп, оқиғаның мән-жайын анықтауға кірісті. Апат салдарынан Саутенд әуежайынан ұшуға тиіс болған төрт рейс тоқтатылып, екі ұшақ басқа әуежайларға (Гатвик пен Станстедке) бағытталды. Қазіргі уақытта әуежай жұмысы шектеулі режимде жүзеге асырылып отыр. Полиция өкілдері жергілікті тұрғындар мен қала қонақтарын апат аймағынан аулақ болуға шақырды. Аймақтағы қозғалыс шектеліп, қауіпсіздік шаралары күшейтілген. Айта кетейік, бұған дейін Италияның Бергамо қаласындағы әуежайда қайғылы жағдай болған. Airbus A319 ұшағының қозғалтқышына ер адам түсіп кетіп, оқиға орнында көз жұмды. Бұл жағдай ұшақ рулеж кезінде болған. Оқиғадан кейін әуежай уақытша жабылды.