Сарыағашта ерте пісетін картопты жинау науқаны басталды

Түркістан облысына қарасты Сарыағаш ауданында ерте пісетін картопты жинау науқаны басталды. Биыл сарыағаштық диқандар 2,1 мың гектар жерге ерте пісетін картоп егіп, қазіргі таңда өнім теріміне қызу кіріскен, деп хабарлайды өңір әкімдігінің баспасөз қызметіне сілтеме жасаған Todayinfo ақпараттық агенттігі. Картоп жинау жұмыстары негізінен Қабланбек, Құркелес, Жартытөбе және Тегісшіл ауылдық округтерінде жүргізілуде. Шаруалар маусымдық жұмыстар арқылы аймақтың азық-түлік қауіпсіздігіне өз үлестерін қосып, ерте өніммен ішкі нарықты қамтуға атсалысуда. Аудандық ауыл шаруашылығы бөлімі ұсынған мәліметке сәйкес, биыл Сарыағаш ауданында жалпы 75,7 мың гектар егістік жерге егін егілген. Оның ішінде: 51,1 мың гектар дәнді және майлы дақылдар (бидай – 40,5 мың га, арпа – 7,9 мың га, жүгері – 1,5 мың га, күнбағыс – 224 га, мақсары – 910 га), 479 гектар – бақша өнімдері, 2,1 мың гектар – картоп, 10,6 мың гектар – көкөніс, 11,5 мың гектар – мал азығына арналған дақылдар. Егін шаруашылығында алдыңғы қатарда келе жатқан аудан еңбек өнімділігі мен ерте пісетін өнімдерді тиімді ұйымдастыру арқылы облыстың аграрлық әлеуетін арттыруда. Аудан әкімдігі мен салалық басқармалар тарапынан суару, техникалық қолдау және өнім өткізу бойынша қажетті шаралар қабылдануда. Айта кетейік, Түркістан облысы бойынша ауыл шаруашылығы өнімдерінің көлемін арттыру және ішкі нарықты қамтамасыз ету мақсатында аграрлық жобалар кешенді түрде жүзеге асырылуда.