Сарыағаштағы сергелдең: қыз алып қашқан жігіттің анасы қуғыншыларға 1,5 млн теңге берген

Шымкентті ғана емес, бүкіл елді Президентпен қоса ренжіткен қыз алып қашудың кезекті оқиғасына қатысты шу басылар емес. Todayinfo.kz порталының  редакциясына қамаудағы жігіттің анасы хабарласып, тың ақпаратты бөлісті. Әлеуметтік желіде Түркістан облысы, Сарыағаш ауданы, Дербісек ауылындағы қыз алып қашу оқиғасы жұртшылықтың назарын аударып, қоғамда үлкен резонанс тудырған еді. Желіде жарияланған мәліметтерде алып қашқан жігіт қызды ұрлап, тіпті зорлады деген деген ақпарат тарады. Редакциямызға хат жазған жігіттің анасы бұл хабар шындыққа жанаспайтынын, жігіт пен қыз бір-бірімен кездесіп жүргенін мәлімдеді. Жігіттің анасының айтуынша, қызды алып келген сәтте жағдай тыныш өткен.

«Қыз үлкен әжесі мен әкесінің рұқсатымен келген. Жігіт жақ қуғыншыларды күтіп алып,  1,5 миллион теңге қалыңмалға берген. Артынан қыздың киімі де келген»,- деді Елібаева Зулфйя.

Жігіт анасының сөзінше, қыздың шешесі де қамалған. Бәлкім ақша үшін осындай әрекетке барған деген күдігін де айтты. Еске салсақ, әлеуметтік желіде 17 жастағы Шымкент тұрғыны оны біреу күштеп ұрлап, Сарыағаш ауданындағы ауылға апарғанын, онда оны күштеп зорлағанын мәлімдеген еді. Қазіргі уақытта күдікті ұсталып, оның үстінен Қылмыстық кодекстің 125-1-бабы "Некеге мәжбүрлеу" бойынша қылмыстық іс қозғалды. Айта кетейік, жәбірленуші қыздың анасы 1 жыл бұрын 5 жылға сотталған, оған дейін де тағы істі болғаны белгілі болды.