Шығын 5,2 млрд теңгеден асады: Кәрім Мәсімовтің экс-күйеу баласына қатысты істің мән-жайы анықталды

Фото: orda.kz “ҚазТемірТранс” компаниясының бұрынғы вице-президенті Азамат Қапеновке қатысты сотқа дейінгі тергеу деректері жарияланды, деп хабарлайды Todayinfo.kz ақпарат агенттігі. Кәрім Мәсімовтің бұрынғы күйеу баласы қызметтік өкілетін асыра пайдаланды және қаржы жымқырды деген күдікке ілінген.

“Қапенов қызметтік өкілетін пайдаланып, жүк вагондарын қолдану қызметін көрсету кезінде өзімен байланысы бар компанияларға заңсыз артықшылықтар берген. Соның салдарынан “ҚазТемірТранс” АҚ-қа 5,2 миллиард теңгеден астам шығын келтірілген. Қазір Қапеновке халықаралық іздеу жарияланған. Сот оны сырттай қамауға алу түріндегі бұлтартпау шарасын санкциялады”, – делінген Қаржы мониторингі агенттігінің мәлімдемесінде.

Келтірілген залалды өтеу және заңсыз алынған активтерді қайтару мақсатында Бас көлік прокуратурасы “Достық” станциясындағы терминалды сотқа дейін тәркілеу туралы өтінішхат жолдаған. Астана қаласының қылмыстық істер жөніндегі ауданаралық сотының қаулысымен аталған мүлік мемлекет кірісіне өткізілді. Қазір тергеу жалғасып жатыр.