Шымкентте таксиге отырған 17 жастағы қыз бір аптадан бері табылмай жатыр

Шымкент қаласында 17 жастағы Арайлым Ермекбайдың жоғалғанына бір аптадан асты. Ол соңғы рет 21 қаңтар күні "Алаш" базары маңындағы аялдамадан таксиге отырғанын айтып, анасымен байланысқа шыққан. Содан бері қыздан еш хабар жоқ, деп хабарлайды Todayinfo.kz Ontustik TV телеарнасына сілтеме жасап.

Жоғалмас бұрын не болған?

Арайлым сол күні жұмысынан шығып, 20:30 шамасында анасына қоңырау шалған. Телефоны қуатсыз қалғандықтан, оны "Алаш" базары маңындағы кафеде қуаттаған. Бір жарым сағаттан кейін қайта хабарласқанда, ол таксиге отырғанын айтқан. Бұл соңғы байланыс болды. Қыздың анасы, Шынар Әжібекова, қызының оғаш қылықтарын бұрын-соңды байқамағанын жеткізді. Арайлым сабағына тиянақты болып, қосымша курстарға қатысып жүрген. Ол Шымкент пен Ордабасы ауданына қарасты Шұбарсу ауылы арасында жұмысқа барып-келіп жүрген.

Отбасы мен құқық қорғау органдарының әрекеті

Арайлым – үйдің екінші баласы, Атамекен жалпы орта мектебінің 11-сынып оқушысы. Болашақта дәрігер болуды армандаған. Анасы оны біреуге сырын ашпайтын, тұйық қыз деп сипаттады. Қызынан екі тәулік бойы хабар ала алмаған ата-анасы Абай аудандық полиция басқармасына жүгінген. Алайда, осы уақытқа дейін іздеу нәтижесіз болып отыр.

Қоғамның үн қатуы маңызды

Құқық қорғау органдары іздеу жұмыстарын жалғастыруда. Жергілікті тұрғындардан да көмек сұралып, қандай да бір ақпарат болса, дереу полицияға хабарлау қажеттігі ескертілді. Жасөспірімнің жақындары қыздың аман-есен табылатынына үміт артып отыр.