Солтүстік Қазақстан облысында (СҚО) қайғылы оқиға орын алды: 44 жастағы ер адам ФГДС (фиброгастродуоденоскопия) процедурасынан кейін ауруханада қайтыс болды.
Оқиға Шал ақын ауданының орталық аудандық ауруханасында болған. Қазіргі уақытта полиция пациенттің өліміне қатысты тергеуді бастады.
Полиция: "Қылмыстық іс қозғалды"
СҚО Полиция департаментінің баспасөз қызметі Tengrinews.kz тілшісіне ер адамның өлімі туралы хабарлама аудандық ауруханадан келіп түскенін растады.
"Аталған факті бойынша қылмыстық іс қозғалды. Істің барлық мән-жайын объективті зерттеуге бағытталған барлық қажетті тергеу шаралары жүргізілуде", - деп хабарлады ведомство өкілдері.
Полиция ҚР Қылмыстық-процестік кодексінің 201-бабына (Тергеу құпиясы) сәйкес, өзге мәліметтердің жария етілмейтінін атап өтті. Процессуалдық шешім тергеу нәтижелері бойынша қабылданады.
Аурухананың жауабы: "Пациентте ауыр дерт болған"
Шал ақын аудандық орталық ауруханасы оқиғаға қатысты өз нұсқасын ұсынды. Олардың айтуынша, пациент диспансерлік есепте болмаған, бірақ кейін анықталғандай, "қолқа аневризмасы" (аорта) секілді ауыр дертпен ауырған.
Мекеме өкілдерінің хабарлауынша, пациенттің тынысы дәрігерлер эндоскопты шығара бастаған сәтте тоқтап қалған. Дәрігерлер дереу жансақтау шараларына кіріскен, алайда ол нәтиже бермеген.
ФГДС дегеніміз не?
Фиброгастродуоденоскопия (ФГДС) – бұл ас қорыту жолдарының жоғарғы бөліктерін (өңеш, асқазан және ішек) зерттеудің ең ақпаратты әдістерінің бірі. Процедура камерамен жабдықталған икемді эндоскоп арқылы жүргізіледі. Ол ауыз қуысы арқылы енгізіліп, дәрігерге шырышты қабықты көзбен бағалауға, ауруларды диагностикалауға және қажет болса, емдік манипуляциялар жасауға мүмкіндік береді.
Бұған дейінгі оқиға: Екібастұздағы өлім
Бұған дейін Екібастұзда тізесіне ине (укол) салғызғаннан кейін 40 жастағы ер адамның қайтыс болғаны хабарланған еді. Жеңіс Бекжігітов есімді азамат 8 қыркүйекте жеке хирургиялық орталыққа тізесінің ауырғанына шағымданып барған.
Оған "остеоартрит" диагнозы қойылып, буын ішіне инъекция салынған. Ертеңіне оның аяғы ісіп, қатты ауырсыну пайда болған. Кейін жағдайы нашарлап, дене қызуы көтеріліп, есінен танып, 14 қыркүйекте көз жұмған. Марқұмның туыстары оның өліміне дәрігерлерді кінәлаған болатын.
