Степногорск қаласында «Халық қатысатын бюджет – 2026» бағдарламасын іске асыру аясында тұрғындардың бастамаларын қабылдау басталды. Аталған жоба қала тұрғындарының өз аулалары мен қоғамдық кеңістіктерін дамытуға тікелей қатысуына мүмкіндік береді, деп хабарлайды Todayinfo.kz ақпарат агенттігі.
Бағдарламаның басты мақсаты – жергілікті халықтың ұсыныстарын ескере отырып, қала инфрақұрылымын жақсарту, өмір сүру сапасын арттыру және тұрғындардың азаматтық белсенділігін көтеру.
Жобалар бойынша өтінімдер 2026 жылдың 1 наурызына дейін қабылданады. Қатысу үшін Степногорск қаласы әкімдігінің ресми интернет-ресурсына кіріп, арнайы электрондық өтінім нысанын толтыру қажет. Сонымен қатар ұсынылатын жобаның эскизін немесе фотосуретін қоса тіркеу міндетті.
Бағдарлама аясында келесі бағыттар бойынша жобалар қабылданады:
– қаланы көгалдандыру және жасыл желек отырғызу;
– балалар ойын алаңдарын салу және жаңғырту;
– спорттық алаңдар мен жаттығу аймақтарын орнату;
– көпқабатты тұрғын үйлердің аулаларын абаттандыру және жарықтандыру.
Ұсынылған жобалар белгіленген талаптарға сәйкестігі бойынша қаралып, арнайы комиссияның шешімімен іріктеледі. Жеңімпаз атанған бастамалар жергілікті бюджет қаражаты есебінен жүзеге асырылатын болады.
Қала әкімдігі барлық тұрғындарды белсенділік танытуға шақырады. Бұл – өз аулаңыздың, көшеңіздің немесе демалыс орнының көркін арттыруға берілген нақты мүмкіндік. Азаматтардың ұсыныстары қаланың дамуына тікелей әсер ететінін ескере отырып, әрбір тұрғын өз идеясын ортаға салуға құқылы.
Белсенді болыңыз – туған қалаңыздың болашағын бірге қалыптастырайық!
https://youtu.be/4HZ9xCgoNUs?si=Q_u5lk10hnZtkGVz
