Тараз қаласында 83 жастағы зейнеткердің өліміне қатысты адам өлтіру дерегі тіркелді.
Күдікті қылмыстан кейін куәгерден қашамын деп полиция департаментінің ғимаратына кіріп кеткен.
Оқиға қаладағы көпқабатты үйлердің бірінің кіреберісінде болған. Зейнеткердің мәйітін тұрғындар байқап, полицияға хабар берген.
Куәгерлердің айтуынша, күдікті оқиға орнынан қашқан. Алайда оны көрген азаматтардың бірі соңынан қуып, нәтижесінде күдікті Тараз қалалық Полиция департаментінің ғимаратына кіріп кеткен.
Қайғылы жағдайды облыстық полиция департаменті ресми түрде растады.
Полиция күдікті туралы не мәлімдеді?
Ведомство мәліметінше, аталған дерек бойынша Қылмыстық кодекстің «Адам өлтіру» бабы бойынша сотқа дейінгі тергеу басталған.
Күдікті ретінде Тараз қаласының 68 жастағы тұрғыны анықталып, уақытша ұстау изоляторына қамалды.
Тергеу қалай жүргізіліп жатыр?
Полицияның хабарлауынша, қазіргі таңда істі жан-жақты әрі объективті қарауға бағытталған барлық қажетті процессуалдық шаралар атқарылып жатыр.
Сонымен қатар, Қылмыстық-процессуалдық кодекстің 201-бабына сәйкес, тергеу мүддесіне байланысты өзге ақпарат жария етілмейді.
