Жетісу облысында ауыр хәлдегі пациентті жеткізбек болған жедел жәрдем көлігі жеңіл көлікпен соқтығысып, аударылып қалды, деп хабарлайды Todayinfo.
Жетісу облысының Текелі қаласында орын алған жол-көлік оқиғасы салдарынан жедел жәрдем көлігіндегі 87 жастағы әйел адам қайтыс болды. Бұл туралы Жетісу облыстық денсаулық сақтау басқармасы мәлімдеді.
Қант диабетімен ауырған науқасқа жедел көмек қажет болды
Жол апаты 2 маусым күні кешке тіркелген. 1938 жылы туған әйелдің жағдайы өте ауыр болғандықтан, жедел жәрдем бригадасы шұғыл шақыртуға жіберілген. Қарт кісі қант диабетінің ауыр түрімен ауырған және созылмалы ауруы күрт асқынған.
«Пациентті тез арада жақын маңдағы медициналық ұйымға жеткізу жоспарланған болатын. Алайда жедел жәрдем көлігі жеңіл автокөлікпен соқтығысып, аударылып қалды», – делінген денсаулық сақтау басқармасының хабарламасында.
Жол апатынан кейін 87 жастағы науқас жансақтау бөліміне жеткізілді
Оқиға орнына дереу жеткен медицина қызметкерлері мен полиция күші зардап шеккендерге жедел көмек көрсетті. Барлық зардап шеккендер Текелі қалалық ауруханасына жеткізілді. Науқас әйел өте ауыр хәлде жансақтау бөліміне жатқызылды. Дегенмен, дәрігерлер оның өмірін аман алып қала алмады. Сол күні сағат 22:40-та биологиялық өлім тіркелді.
«Пациент жол апатынан емес, негізгі созылмалы ауруының асқынуынан көз жұмды», – деп нақтылады басқарма өкілдері.
Басқа зардап шеккендердің жағдайы тұрақты
Жол апатынан жарақат алған өзге адамдардың жағдайы орташа ауыр деп бағалануда. Олардың біреуі амбулаторлық емге жіберілді. Қазіргі уақытта жол-көлік оқиғасына байланысты қылмыстық іс қозғалды, тергеу амалдары жүргізілуде.
