Теміртауда №107 автобустағы жанжал: 18 жастағы жігітке пышақ сұғылды

Теміртауда маршруттық №107 автобуста екі жолаушының жанжалы төбелеске ұласып, 18 жастағы қала тұрғыны пышақ жарақатын алды. Бұл туралы Todayinfo порталы хабарлайды. Оқиға жолаушылардың бірі автобустың форточкасын ашпақ болған сәттен басталған. Сол үшін екінші жолаушымен сөзге келіп қалған. Көп ұзамай ауызша кикілжің төбелеске айналып, 30 жастағы ер адам пышақ шығарып, 18 жастағы теміртаулықтың аяғына бір рет сұғып алған.

Қан тоқтатуға жолаушылар көмектесті

Жарақат алған жігіттің аяғынан қан кеткен. Автобус бірден тоқтап, оқиға орнына жедел жәрдем мен полиция шақырылған. Дәрігерлер келгенге дейін жолаушылар жігіттің аяғын шарфпен таңып, қанын тоқтатуға тырысқан. Жедел жәрдем бригадасы алғашқы көмекті оқиға орнында көрсеткен. Алдын ала мәлімет бойынша, жәбірленуші ауруханаға жатқызылмаған.

Күдікті ұсталып, уақытша ұстау изоляторына қамалды

Полиция оқиға орнында 30 жастағы күдіктіні анықтап, ұстаған. Ол уақытша ұстау изоляторына қамалды. Полиция департаментінің баспасөз қызметі тергеу үшін қажетті әрекеттер жүргізіліп жатқанын, істің мән-жайы жан-жақты әрі объективті қаралатынын хабарлады. Тергеу барысы департамент бақылауында.