Теңіздегі табыс: өндіріс 60%-ға қалпына келді, бірақ бюджет 200 млрд теңге жоғалтты

Теңізде мұнай өндіру 60%-ға қалпына келтірілді. 8 ақпандағы жағдай бойынша өндіріс көлемі тәулігіне 550 мың баррельді (70 мың тонна) құраған. Компания 23 ақпанға дейін тәуліктік көрсеткішті 950 мың баррельге жеткізуді жоспарлап отыр, деп хабарлайды Todayinfo ақпарат агенттігі. Теңіздегі өндірістің тезірек қалпына келуі ел экономикасы үшін аса маңызды. Себебі бұған дейін бірқатар кәсіпорын қиындыққа тап болған. Мәселен, KPI (полипропилен) зауыты қаңтар айында Ресейден 11 мың тонна пропан импорттауға мәжбүр болды. Бұған Теңізде сұйытылған мұнай газын өндірудің шектелуі себеп. Бұған қоса, «Теңізшевройл» компаниясы Құлсары қаласының тұрғындарын, Атырау ЖЭО-сын (мың текше метріне 16 доллардан), Ақтаудағы МАЭК-ті және Атыраудағы газ-химия нысандарын тауарлық газбен қамтамасыз етіп келген. Өндіріс көлемінің азаюы басқа салаларға да әсер етті. Түйіршіктелген күкірт өндірісінің қысқаруы салдарынан Қазақстанда күкірт қышқылын шығару азайған. Бұл өз кезегінде уран өндіру көлеміне кері әсерін тигізді. Салық түсімдері де айтарлықтай кеміген. Есептеулер бойынша, өндірілмеген әрбір тонна мұнайдан бюджетке шамамен 100 мың теңге салық түспей қалған. Егер 2 миллион тонна кем өндірілді деп есептесек, бұл – бюджетке түспеген 200 миллиард теңге.