Блогер 7 жылға сотталуы мүмкін: «Халықтан жиналған ақша енді мемлекеттікі» дейді прокурор

Астанада танымал блогерлер Жанабыловтар отбасына қатысты сотқа дейінгі тергеу жаңа сатыға көшті. Бұрын заңсыз кәсіпкерлікпен айналысты деп айыпталған ерлі-зайыптыға енді «қылмыстық жолмен алынған ақшаны заңдастырды» деген бап қосылды, деп хабарлайды Todayinfo ақпарат агенттігі. Блогерлер Ерболат Жанабылов пен Эльмира Төлегенованың адвокаты Жасұлан Рахымғалиевтің айтуынша, іс Қылмыстық кодекстің 214-бабы (Заңсыз кәсіпкерлік) және 218-бабы (Ақшаны жылыстату) бойынша қаралып жатыр. Қорғаушы тарап істің күрделеніп кеткенін мәлімдеді.

«Қорғау жұмыстарының нәтижесінде тергеу органы бұдан да ауыр бап қозғау керек деген шешімге келді. Қазір Жанабыловтарға ақшаны жылыстату айыбы тағылды. Оған қоса, іс материалында прокурордың талап-арызы пайда болды. Ол мемлекет мүддесі үшін қарапайым азаматтардан жиналған қаражатты өндіріп алуды сұрайды. Прокурордың пікірінше, бұл ақша енді мемлекеттікі болып саналады. Ең қауіптісі — қазір Жанабыловтарға қатысты бұлтартпау шарасы таңдалып жатыр», — деді адвокат Жасұлан Рахымғалиев.

Адвокаттың сөзінше, қылмыстық жолмен алынған ақшаны заңдастыру бабы бойынша айыпты деп танылғандар 7 жылға дейін бас бостандығынан айырылуы мүмкін. Фото: Әлеуметтік желіден