Алматы қалалық полиция департаментінің мәліметінше, қоғамдық орындарда агрессивті мінез-құлық көрсеткен жасөспірімдер анықталды, деп хабарлайды Todayinfo.kz ақпарат агенттігі.
Тексеруге әлеуметтік желілерде тараған бейнежазбалар негіз болған. Онда бір топ кәмелетке толмағандардың азаматтарға қатысты әдепсіз әрі шабуыл сипатындағы әрекеттері көрініс тапқан.
Оқиғаға байланысты Медеу және Алмалы аудандарының полиция басқармалары тексеру жүргізіп, барлық қатысушылардың жеке басын анықтады. Жасөспірімдер полиция бөлімшелеріне жеткізілген.
Белгілі болғандай, олар Тәжікстан Республикасының азаматтары. Қазіргі уақытта кәмелетке толмағандар арнайы бейімдеу орталығына орналастырылып, профилактикалық жұмыстар жүргізілуде.
Тексеру қорытындысы бойынша олардың заңды өкілдері балаларды тәрбиелеу міндеттерін тиісінше орындамағаны үшін әкімшілік жауапкершілікке тартылған.
Сонымен қатар, аталған тұлғаларға қатысты көші-қон заңнамасы аясында елден шығару шаралары қарастырылуда.
Қазіргі уақытта барлық деректер бойынша тексеру жалғасып жатыр. Нәтижесінде жасөспірімдердің әрекеттеріне құқықтық баға беріледі.
Полиция өкілдері мұндай жағдайларда ата-аналардың жауапкершілігі ерекше маңызды екенін атап өтіп, балалардың бос уақыттағы әрекеттерін бақылауды күшейту қажет екенін ескертті.
