Желіде тараған хабарламалардан кейін Қарағанды мектептеріне күшейтілген күзет қойылды

Фото: Оқу ағарту министрлігі Әлеуметтік желілер мен мессенджерлерде Қарағандыда бірқатар мектептерде оқушыларға қарсы заңсыз әрекеттер ұйымдастырылып жатыр деген ақпарат тарады, деп хабарлайды Todayinfo.kz ақпарат агенттігі. Қарағанды облысы полиция департаменті дереу тексеру жүргізуге кіріскен. Тексеріс кезінде балаларға ешқандай қауіп төнбегені анықталды. Десе де қаладағы барлық мектептерге күшейтілген күзет қойылды. Шаһардағы барлық жалпы білім беретін оқу орындары полицияның бақылауына алынды. Қоғамдық тәртіп пен қауіпсіздікті қамтамасыз ету үшін қосымша шаралар қабылданбақ.

“Қазір аталған ақпаратты таратқан тұлғаларды анықтау үшін жедел-тергеу шаралары жүргізіліп жатыр. Барлық мән-жайлар анықталғаннан кейін олардың әрекеттеріне заңнамаға сәйкес құқықтық баға беріледі. Халық арасында, оның ішінде әлеуметтік желілер мен мессенджерлер арқылы дүрбелең тудыратын жалған хабарламаларды тарату қылмыстық жауапкершілікке әкеп соғады, тіпті бас бостандығынан айыру жазасы да қарастырылған”, – деп мәлімдеді Қарағанды облысы полиция департаменті.

Ведомство ата-аналарды сабыр сақтауға, үрейге берілмеуге және тек ресми ақпарат көздеріне ғана сенуге шақырды. Сонлай-ақ жағдай ішкі істер органдарының толық бақылауында деп сендірді.