Үкімет басшысы Олжас Бектенов кәсіпкерлер арасында үлкен дау тудырған жаңа салық реформасына қатысты пікір білдірді. Премьер-министр "жеңілдетілген" (упрощенка) режимдегі әріптестерімен жұмыс істеуден қорқып қалған бизнесті сабырға шақырды.
Мәселенің төркіні Салық кодексінің жаңа жобасындағы өзгерісте жатыр. Енді жалпыға бірдей режимдегі компаниялар "жеңілдетілген" декларациямен жұмыс істейтін жеткізушілердің қызметін шығынға жатқыза алмайды деген ақпарат тараған болатын. Бұл жаңалық нарықта дүрбелең туғызды.
Қарапайым тілмен айтқанда бұл не деген сөз?
Бұрын ірі компания (жалпы режимдегі) шағын кәсіпкерден (упрощенка) 1 миллион теңгеге тауар алса, ол соманы шығын ретінде көрсетіп, салықты аз төлейтін.
Ал жаңа ереже бойынша, бұл сома шығынға жатпайды. Демек, ірі компанияға шағын кәсіпкермен жұмыс істеу тиімсіз болып қалады, өйткені олар артық салық төлеуге мәжбүр болады. Сарапшылар мұны "шағын бизнесті тұншықтыру" деп бағалаған еді.
Премьер-министр қандай шешім ұсынды?
Олжас Бектеновтің айтуынша, бұл мәселе 400 мыңға жуық шағын және микробизнес өкіліне қатысты болғандықтан, алаңдаушылық орынды. Алайда ол кәсіпкерлерді "болашағына алаңдамауға" шақырды.
Үкімет басшысының сөзінше, мемлекет шағын бизнесті далада қалдырмайды. Ол үшін бірқатар нақты тапсырмалар берілді:
-
Қаржы министрлігіне: салықтық әкімшілендірудің сервистік моделін енгізу және түсіндіру жұмыстарын күшейту;
-
Ұлттық банкпен бірлесіп: шағын бизнес үшін салық есебін автоматты түрде толтыру жүйесін іске қосу.
Кәсіпкерлерге қандай балама көмек болады?
Үкімет тек салықтық емес, басқа да қолдау шараларын қарастыруда. Ұлттық экономика министрлігіне жалпы режимде жұмыс істейтін шағын және орта бизнес үшін қосымша жеңілдіктер әзірлеу тапсырылды.
Соның бірі – "Өрлеу" бағдарламасы аясында қаржыландыру критерийлерін кеңейту. Яғни, мемлекет бизнеске арзан несие мен субсидия арқылы қолдау көрсетуді көздеп отыр.
