Жетісуда «Таза Қазақстан» қорытындыланды: 100 сенбілік өтіп, үздіктер марапатталды

Жетісу облысында «Таза Қазақстан» республикалық экологиялық акциясы аясында бір жыл бойы атқарылған жұмыстардың қорытындысы шығарылды. Осыған арналған «ECOFINAL 2025: 100 тазалық қадамы» атты қорытынды іс-шара өтіп, өңірдегі экобастамалардың нәтижесі сараланды. Бұл туралы Todayinfo порталы хабарлайды. Кездесудің басты мақсаты – жыл бойғы сенбіліктер мен акциялардың тиімділігін таразылап, табиғатты қорғау мен тазалық мәдениетін күнделікті әдетке айналдыруға үндеу болды. Ұйымдастырушылар тұрғындардың экологиялық жауапкершілігін күшейтіп, волонтерлік қозғалысты дамытуға да мән бергенін айтты. Айрықша тұсы – бастама облыстың барлық аудан-қаласын қамтыды. 3–25 желтоқсан аралығында «100 тазалық қадамы» көпкүндік акциясы өтіп, өңір бойынша 100 экологиялық сенбілік ұйымдастырылған.

«100 тазалық қадамы»: аудан-қала түгел атсалысты

Мұндай формат Жетісуда бірлік пен ортақ жауапкершілік рухын күшейтуге бағытталды. Ұйымдастырушылардың айтуынша, көпшілікке ашық сенбіліктер тұрғындардың табиғатқа жанашыр көзқарасын қалыптастыруға ықпал еткен. Қорытынды жиында жыл бойы өткен экосенбіліктердің, акциялар мен жобалардың нақты нәтижелері таныстырылды. Белсенді қатысушыларға алғыс хаттар мен марапаттар тапсырылды.

Үздік аудан, белсенді жастар марапат алды

«Qosyl» жобасы аясында үздік деп танылған Ескелді, Сарқан және Ақсу аудандары арнайы марапатқа ие болды. Марапаттарды «Тамшыбұлақ» қоғамдық бірлестігінің басшысы Жанат Тулемисова табыстады. Сондай-ақ өзге аудандық жастар ресурстық орталықтарының жетекшілеріне алғыс хаттар берілді. Ал жоғары оқу орындары мен колледждер, сондай-ақ белсенді волонтерлерді «Jetisu jastary» КММ директоры Шамиль Ванкеев марапаттады. Салтанатты жиында жауапты сала өкілдері құттықтау сөз сөйлеп, қатысушыларға концерттік бағдарлама ұсынылды. Ұйымдастырушылар бұл алаң экологиялық мәдениетті кеңінен насихаттап, жастардың азаматтық белсенділігін арттыруға және қоршаған ортаға жауапкершілікпен қарауға түрткі болғанын атап өтті. Іс-шараға волонтерлік ұйымдардың жетекшілері мен белсенділері, аудандық және қалалық жастар ресурстық орталықтарының өкілдері, жоғары оқу орындары мен колледж студенттері қатысты. Жетісу облысы, Таза Қазақстан, экологиялық акция, сенбілік, волонтерлер