Руслан Жақсылықов туралы жалған ақпарат таратқандардың үстінен қылмыстық іс қозғалды. Қазіргі уақытта тергеу жүріп жатыр, деп хабарлайды Todayinfo.
Ішкі істер министрлігі Қорғаныс министрі болған Руслан Жақсылықовтың қамауға алыну туралы ақпаратқа байланысты мәлімет берді.
— Сұраухатта көрсетілген адамның қамауға алынғаны туралы бұқаралық ақпарат құралдарында көрінеу жалған ақпарат тарату фактісі бойынша Астана қаласының Полиция департаменті Қылмыстық кодектің 274-бабы 2-бөлігі бойынша (бұқаралық ақпарат құралдарын немесе телекоммуникациялар желілерін пайдалана отырып, көрінеу жалған ақпарат тарату) сотқа дейінгі тергеу жүргізіп жатыр, — деп жазылған kaz.inform агенттігіне берген ресми жауапта.
Бірақ министрлік қылмыстық іс нақты кімдердің үстінен қозғалғанын айтудан бас тартып отыр. Ал Р. Жақсылықовтың қамауға алынғанын анонимді телеграм-арналар таратып, кейін оны кейбір ақпарат порталдары көшіріп басқан болатын.
— ҚР Қылмыстық-процестік кодексінің 201-бабына сәйкес сотқа дейінгі тергеп-тексеру деректері жария етілмеуі тиіс. Тергеу жүргізіліп жатыр. Анық-қанығы тергеу барысында анықталады. Басқа мәлімет бере алмаймыз, — деді ішкі істер министрлігіндегілер.
