Танымал спортшы әрі қоғам белсендісі Сабина Алтынбекова Ақтөбедегі мешітте орын алған даулы оқиғаға қатысты пікір білдіріп, бейәдеп ұсыныс естіген бойжеткенге қолдау көрсетті. Ол сондай-ақ бойжеткенді айыптағандарды сынға алып, мұндай жағдайда қыздың емес, ер адамның әрекеті сөз болуға тиіс екенін атап өтті, деп хабарлайды Todayinfo.
«Осындай жағдайда өз басым болсам, жай ғана видеоға түсіріп қоймай, қолымнан келгенше қарсы тұрар едім. Қызды емес, оған тиіскен адамды сынау керек. Өзін “нағыз еркекпін” дейтіндер қызды емес, дінді бетперде етіп, оны кінәлауға көшкен. Бұл Ауғанстан емес қой! Осындай жайттарда кінәліні емес, жәбірленушіні жазғырудан қашан арыласыңдар?!» – деп жазды спортшы әлеуметтік желідегі парақшасында.
Айта кетейік, бұған дейін әлеуметтік желіде блогер Эмануелла Наурызбаева мешітте өзінен әлдеқайда үлкен ер адамның «бір реттік неке» ұсынғанын айтып, видео жариялаған болатын. Оқиға жұртшылық арасында қызу талқыланып, кейбір қолданушылар бойжеткенді айыптауға көшкен. Сабина Алтынбекова осындай пікірлерге қарсылық білдіріп, қыздың намаз оқу ниетімен мешітке келгенін, ал арнайы есік жабық болған соң, басқа есікті пайдаланғанын атап өтті.
Көпшілік спортшының пікіріне қолдау білдіріп, қыздың әрекетін дұрыс деп бағалаған. Ал қызға қысым көрсеткен азаматтарға Сабина «жайыңа жүр» деп кеңес берді.
Фото: ©instagram.com/altynbekova_20
