Өзбекстаннан келген емші еркек әйелдердің омырауы мен бөксесінен ұстап, дем салып жүр, деп хабарлайды Todayinfo.
Оның видеосы желіде жүр. Кадрларда алпысты алқымдаған ер адамның жас келіншектердің денесін сипалап, қолмен «ем жүргізгенін» көруге болады. Өзбек-орыс тілін араластыра сөйлеген еркек «саған көмектесемін, жаным» деп ауырып келген әйелдің кеуде тұсынан ұстап, белінен қағып, кейін бөксесінен сипалаған.
Видеода бел, тізе ауруына шағымданған әйелдердің емшінің «сеансына қатысып» отырғанын байқауға болады. Олар таза қазақша сөйлеп отыр.
Балгер бәріне бірдей «ем-домды» жасап жатыр.
Бейнежазбаның авторы емші туралы мынадай жазба қалдырған:
«Енді Қазақстанда да сайқымазақ болып, адамдарды алдап, сөзбен арбап ақша табуды бастапты. Әй, адамдар, мұндайларға сенбеңдер!»
Айта кетсек, бұған дейін де қоғам белсендісі Байкал Саимов осы емшінің Шымкенттің Сайрам ауданында жұртты алдап, емшілікпен айналысып жатқанын айтқан еді.
«Өзімізде алаяқтар аз еді, енді Өзбекстаннан қашып келген біреу Шымкенттің Сайрам ауданының орталығында «емші» болып, адам қабылдап жатыр екен.
Адам басына бір сеанс – 15 000 теңге. Комментарийлерді оқып шықтым – өзбек ағайындардың өздері: «бұл алаяқ, елден қуылған» деп жатыр.
Ал бұл көкем күніне 1000 адамға дейін қабылдап, спокойно емін жүргізіп, халықтың қалтасын қағып жүр. Есептей беріңіз, арабша бір-екі сөз айтып, қолымен сипап, «сүф» деп үрлегені үшін, күніне — 15 000 000 теңге.
Айналайын, аңқау халқым! Не болды сендерге? Ауру – батпандап кіріп, мысқылдап шығады дейді. Ешбір дерт бір сипаумен, бір үрлеумен жазылмайды», — деп жазған болатын ол.
