Бүгін Маңғыстау аудандық сотында Ақжігіт ауылында болған кәмелетке толмаған жігіттің өліміне қатысты қылмыстық іс бойынша үкім жарияланды. Бұл шешім жәбірленуші тарапты қанағаттандырмады, деп хабарлайды Todayinfo порталы Lada.kz сілтеме жасап.
Сот шешімі туралы Lada.kz сайтына жәбірленуші тараптың өкілі, Маңғыстау облыстық заң кеңесшілері палатасының мүшесі Ажар Әбділ мәлімдеді.
— Сот айыпталушыға орташа қауіпсіздік деңгейіндегі түзеу мекемесінде 10 жыл бас бостандығынан айыру жазасын тағайындады, — деді Ажар Әбділ.
Оның айтуынша, марқұмның отбасы бұл үкіммен келіспейді, себебі олар жазаны қылмыстық топтың барлық мүшесі алуы керек деп санайды.
— Үкімді алғаннан кейін біз Маңғыстау облыстық сотына апелляциялық шағым түсіреміз, — деді ол.
Марқұмның туыстары айыпталушылардың саны көбірек болуы керек деп есептейді.
Қылмыстан кейін көп ұзамай ауыл тұрғындары мектеп оқушыларын қорқытып-үркітіп, ақша жинаумен және өз ауласында шаруашылық жұмыстарын істетуге мәжбүрлеген ұйымдасқан топтың барын айтқан. Туыстарының пайымынша, Сағындық сол топтың құрбаны болған.
Жиырмадан астам отбасы бопсалау деректерін тексеруді сұрап полицияға шағымданған. Алайда прокуратура ондай фактілерді таппаған.
Сағындық Құрманияздың туыстары істі «топтық қылмыс» деп қайта саралап, барлық қатысы бар адамдарды жазалауды талап еткен. Іс сотқа жеткенде жәбірленуші тарап қосымша тергеу жүргізу туралы өтініш түсірген, бірақ сот оны қанағаттандырмады.
— Біз тергеу бұл ұйымдасқан қылмыстық топтың әрбір қатысушысына баға беруі керек деп есептейміз. Әсіресе, ұйымдастырушыны, орындаушыны анықтау қажет еді. Кем дегенде 4 адам бар. Сондай-ақ жәбірленушілер қорқыту, бопсалау, мәжбүрлі жұмыс сияқты жайттарға да тиісті баға берілмегенімен келіспейді, — деді Ажар Әбділ.
Бейнеу ауданы Ақжігіт ауылында 11-сынып оқушысы Сағындық Құрманияз 8 сәуірде күмәнді жағдайда қаза тапты. Туыстарына оның құлап, жарақат алып, соның салдарынан қайтыс болғанын айтқан. Алайда көп ұзамай оның өлтірілгені анықталды.
Сағындық Құрманияз ата-анасының жалғыз баласы болған. Ол химия-биология бағыты бойынша университетке түсуге дайындалып жүрген.
Сот алдында марқұмның 20 жастағы ауылдасы отырды. Ол ҚР ҚК 196-бабы 3-бөлігі («Адам өліміне әкеп соққан қасақана ауыр дене жарақатын салу») бойынша айыпталды.
