Танымал тәуелсіз журналист, Ulysmedia.kz ақпарат порталының бас редакторы Самал Ибраевакәсіби қызметіне байланысты цифрлық зорлық-зомбылық пен қысым көріп жатқанын мәлімдеді,деп хабарлайды Todayinfo.
Белгісіз тұлғалар журналистің фотосы, аты-жөні және телефон нөмірін Kyzdar.netсайтындағы жалған интим-профиль арқылы жариялап жіберген. Бұл жағдай медиа саласына және сөз бостандығына бағытталған ашық шабуыл ретінде бағалануда.
«Телефонымды тоқтаусыз мазалап жатыр, таныстарым сұрақ қойып жатыр»
Журналисттің айтуынша, соңғы күндері оған мазмұны бейәдеп қоңыраулар мен хабарламалар үздіксіз түсіп жатыр. Жағдайдың мән-жайын түсіндіруге мәжбүр болған Самал Ибраева бұл шабуылды жоспарлы киберқылмыс және жала жабу әрекеті деп бағалайды.
«Бұл – менің жеке өміріме, абыройыма, ар-намысыма және кәсіби беделіме қарсы жасалған қылмыс. Бұл – нағыз цифрлық зорлық», – деді ол.
Полиция кибершабуылды мойындап, іс қозғады
Бес күннен кейін полиция бұл оқиғаны киберқылмыс және цифрлық буллинг ретінде танып, қылмыстық іс қозғаған. Бұған дейін де Ulysmedia.kz командасы дәл осындай жағдайға тап болған. Сол жолы да тергеу жұмыстары Президент Қасым-Жомарт Тоқаевтың араласуынан кейін ғана ілгері жылжыған болатын.
Президентке ашық үндеу: «Бұл кез келген әйелге қатысты жасалуы мүмкін»
Журналист Самал Ибраева бұл жағдайды жай ғана жеке шабуыл емес, тәуелсіз журналистикаға, сөз бостандығына қарсы жасалған қасақана әрекет деп бағалап, Қазақстан Президентінен қолдау сұрады.
«Құрметті Президент мырза! Мен – Қазақстан Республикасының азаматы, журналист және қоғамдық белсенді ретінде Сізден осы істі жеке бақылауыңызға алуыңызды сұраймын. Бұл – кез келген қазақстандық әйелге жасалуы мүмкін шабуылдың айқын мысалы», – деді ол өз үндеуінде.
Ulysmedia.kz редакциясы: «Қысымға қарамастан жұмысымызды жалғастырамыз»
Самал Ибраева мәлімдемесінің соңында Ulysmedia.kz редакциясы қандай да бір қысымға қарамастан, тәуелсіз, шынайы ақпарат таратуын тоқтатпайтынын мәлімдеді.
