Алматылықтарды таңғалдырған оқиға әлеуметтік желілерде қызу талқыланып жатыр. Қала тұрғындары Әл-Фараби даңғылы бойында жұмыс істеп жүрген коммуналшылардың сарғайған шөпке жасыл сұйықтық шашып жатқан сәтін видеоға түсіріп алған.
Бұл не?
Медеу ауданы әкімдігі жағдайға қатысты түсініктеме берді. Анықталғандай, жаздың қуаң болуына байланысты көгалдардың эстетикалық келбетін сақтау үшін арнайы органикалық негіздегі бояғыш пен тыңайтқыш қосылған ерітінді қолданылған.
«Бұл құрал – тағамдық бояғыш пен тыңайтқыштардан тұратын қоспа. Ол улы емес, адамдар мен жануарлар үшін қауіпсіз. Шөпке жасыл реңк беріп, күтім жасалғандай көрініс қалыптастырады», – делінген Медеу ауданы әкімінің аппаратынан.
Әкімдік бұл тәсіл құрғақ климатты елдерде кеңінен қолданылатынын атап өтті.
Бұған дейін не болған еді?
2024 жылдың қарашасында да осындай жағдай орын алған. Бір тұрғын Байзақов көшесі бойында жерді жасыл түске бояп жатқан жұмысшыларды видеоға түсірген. Ол кезде қала әкімдігі түсіндірме беріп, бұл гидроегіс әдісі екенін мәлімдеген. Бұл технологияда шөп тұқымдары мульча, тыңайтқыш және түс беретін бояғышпен араластырылып, жерге сұйық күйінде себіледі.
View this post on Instagram
