Астанада ел тарихында тұңғыш рет ұлттық сусын – қымызға арналған ірі гастрофестиваль «BaiQymyz – бапталған қымыз» өтті деп хабарлайды Todayinfo.kz ақпараттық порталы.
Фестивальдің алғашқы күнінде, елордада жаңа рекорд тіркелді – еліміздің түкпір-түкпірінен қатысушылар Астанаға 30 тоннадан астам қымыз әкелді. Мұндай ауқымдағы шара Қазақстанда бұрын-соңды өткізілмеген.
Ал, Абай облысы үшін жағымды жаңалық!
Астана әкімдігі ұйымдастырған «Бай қымыздың» жеңімпаздары белгілі болды. Алғаш рет республикалық деңгейде өткен “Бай қымыз” гастрофестивалінде Абай облысының Саржал ауылы бас жүлдені жеңіп алды. Бұл туралы облыс әкімі Берік Уәли өзінің әлеуметтік желідегі парақшасында сүйіншіледі.
“Саржалдың сары қымызы – көптен бері ел аузында жүрген, талай жұрттың таңдайын қақтырған табиғи өнім. Бірақ бүгінгі жеңіс тек дәм арқылы емес, әділ де ашық дауыс беру нәтижесінде анықталды. Демек, бұл – халықтың өзі берген әділ баға!” – деп жазды өңір басшысы.
Әкімнің айтуынша, бұл жеңіс – өңірдің әлеуетін, табиғи өнімге деген адалдығы мен дәстүрге деген құрметін паш еткен маңызды оқиға. Әсіресе, Абайдың 180 жылдығы қарсаңында мұндай жетістік ерекше символдық мәнге ие.
Іс-шараның алғашқы күні-ақ 70 мыңнан астам қонақ келіп, фестивальге қатысушылар арасында тек астаналықтар мен Қазақстанның өңірлерінен келген тұрғындар ғана емес, алыс-жақын шетелден келген туристер де болды, дейді Астана қаласы әкімдігінің ресми сайты.
Берік Уәли аталмыш марапаттың ішкі туризм мен өңірлік брендтерді дамытуға жаңа серпін беретініне сенім білдірді. Сондай-ақ, қымыз өндірушілерге, ұйымдастырушыларға және дауыс берген жұртшылыққа алғыс айтты.
“Жеңіс құтты болсын, жерлестер!” – деп түйіндеді Абай облысының әкімі.
Айта кетейік, фестиваль 19-20 шілде күндері Астанадағы «Қазанат» атшабарында өтті. Қымыздан дәм татумен қатар, келушілер ұлттық тағамдардан ауыз тиіп, фольклорлық өнерді тамашалап, қолөнер жәрмеңкесін аралап, концерттер мен жылқы көрмесіне қатыса алады.
«Ең үздік қымыз» байқауының жеңімпаздары:
• І орын – Абай облысы, Саржал ауылы, «Жаныс» шаруа қожалығы – 20 млн теңге;
• ІІ орын – Қарағанды облысы, Қарқаралы қымызы, «Қарынши» шаруа қожалығы – 15 млн теңге;
• ІІІ орын – Ақмола облысы, Қымызнай қымызы, «Қабдулин» шаруа қожалығы – 10 млн теңге.
Zhanykulov Foundation қоры тағайындаған арнайы номинациялар бойынша да үздіктер марапатталды:
• «Алтын күбі» номинациясы – Қарағанды облысы, «Батыр рух» – 1 млн теңге;
• «Алтын қор» номинациясы – Ұлытау облысы, Жаңарқа, «Nomad milk» – 1 млн теңге;
• «Күміс торсық» номинациясы – Абай облысы, Қарауыл ауылы, «Әділ қымыз» – 500 000 теңге;
• «Текті сусын – Күміс шара» номинациясы – Ақмола облысы – 500 000 теңге.
Фестиваль аясында өткен маңызды шаралардың бірі – «Ер Қанаты» атты тұңғыш жылқы көрмесі болды. Бұл көрмені 3 000-нан астам адам тамашалады.
Келушілер назарын элиталы тұқымдар – гонновер, таза қанды ағылшын, орыс желісті, ахалтеке жылқылары мен қазақы тұқымдар: жабы, мұғалжар, қостанай, бесқарағай және «Ұлы Дала Жорығы» бәйгесінің чемпиондары ерекше аудартты.
Көрме жеңімпаздары:
• «Қазақтың ең сұлу жылқысы» номинациясы – мұғалжар тұқымы;
• «Қазақтың ең жүйрік жылқысы» номинациясы – қостанай тұқымы.
Қазақстан Президенті Қасым-Жомарт Тоқаев өз сөздерінде ұлттық жылқы шаруашылығын қолдаудың маңыздылығын бірнеше рет атап өткен болатын. «Ер Қанаты» жобасының авторы және ұйымдастырушысы Әділ Орынбасарұлы бұл бастама жастарды ұлттық дәстүрлерге баулып, қазақтың ат мәдениетін сақтау жолындағы маңызды қадам екенін айтты.
«Ер Қанаты – бұл жай көрме емес, бұл – қазақтың ат мәдениетін сақтап қалу жолындағы қозғалыс», – деді Әділ Орынбасарұлы.
Ұйымдастырушылардың айтуынша, «Ер Қанаты» жыл сайынғы дәстүрлі шараға айналады, ал келесі көрме Қазақстан Республикасының күніне орайластырылып өткізілмек.
BaiQymyz гастрофестивалі 19-20 шілде күндері «Қазанат» ипподромында өтті. Аталған жоба елордалықтар мен қала қонақтары тарапынан үлкен қолдауға ие болды.
