Семей қаласында халық көптен күткен жаңа облыстық көпсалалы аурухананың құрылысы басталды. Бұл жоба – Абай облысын дамытудың кешенді жоспары аясында қолға алынған маңызды қадам. Аурухана іргетасының қалануына арналған салтанатты шараға облыс әкімі Берік Уәли, сала ардагерлері мен медицина қызметкерлері қатысты. Бұл туралы Todayinfo ақпарат агенттігі хабарлайды.
Жаңа медициналық мекеме – өңір тұрғындарының денсаулығын жақсартуға бағытталған стратегиялық нысан. Аурухана 300 төсек-орынға лайықталып салынып, бір ауысымда 250 адамға қызмет көрсете алатын кеңес беру және тексеру бөлімін қамтиды. Бұл – қазіргі заман талабына сай жабдықталатын, көп салалы қызмет ұсынатын емдеу орталығы болмақ.
Медициналық инфрақұрылымды жаңғырту – уақыт талабы
Абай облысы – тарихи тұрғыда қазақ медицинасының қалыптасуына үлес қосқан аймақ. Алайда соңғы онжылдықтарда өңір медициналық тұрғыда тоқырауға ұшырады. Облыс әкімі Берік Уәли бұл жобаның маңыздылығын ерекше атап өтті:
«Абай облысы – ертеден дәрігерлік дәстүрі қалыптасқан киелі өңір. Алайда, бұл сала ұзақ жылдар бойы ескерусіз қалды. Бүгінгі аурухана құрылысы – сол үзілген үрдістің қайта жалғануы. Жаңа нысан заманауи технологиялармен жабдықталып, сапалы медициналық көмек көрсетуге жол ашады», – деді ол.
Облыста қазіргі таңда 31 стационарлық медициналық ұйым бар, оның ішінде 20-сы мемлекеттік болса, 11-і жекеменшік. Бірақ көрсеткіш көңіл көншітпейді: 10 мың адамға шаққанда небәрі 59 төсек-орыннан келеді. Бұл – республикадағы ең төменгі көрсеткіштердің бірі. Жаңа аурухана бұл олқылықтың орнын толтырып, стационарлық көмек сапасын арттырады.
Семей медицинасының жаңа тынысы
Қазіргі кезде облыстық мамандандырылған медициналық қызметтің 70 пайызы Семей қаласында шоғырланған. Барлық стационарлар дерлік ескі әрі техникалық базасы тозған. Мысалы, 300 төсекке лайықталған Жедел жәрдем ауруханасы күнделікті 375 науқасты қабылдап отыр. Бұл – науқастарға сапалы көмек көрсетуге кедергі келтіретін факторлардың бірі.
Жаңа аурухана дәл осы проблемаларды шешуге бағытталған. Онда кардиология, инсульт, гинекология, токсикология, неврология, травматология сияқты бағыттар бойынша толыққанды көмек көрсетіледі. Сонымен қатар, ауыл тұрғындарына арналған телемедицина орталығы құрылып, шалғай елдімекендерге кеңес беру қызметі жақсарады.
2027 жылы пайдалануға беріледі
Мердігер компаниялардың мәліметіне сүйенсек, аурухана құрылысын аяқтап, 2027 жылы толықтай пайдалануға беру жоспарланып отыр. Бұл – медициналық кадрлардың өңірге қайта оралуына, жас дәрігерлердің тұрақтауына, әрі жергілікті халықтың өз өңірінде сапалы медициналық көмек алуына мүмкіндік береді.
Мемлекет басшысының тапсырмасымен жүзеге асырылып жатқан бұл жоба – Абай облысының әлеуметтік-экономикалық әлеуетін арттырып, азаматтардың өмір сапасын жақсартуға бағытталған нақты қадам.
