Шығыс Қазақстан облысында ауыл тұрғынының 15 қойын қырып кеткен сілеусін емес, қасқыр екендігі анықталды, деп хабарлайды Todayinfo агенттігі.
Еске салсақ, оқиға Самар ауданы Бастаушы ауылдық округіне қарасты Көкжота ауылында болған. Қораға кіріп кеткен белгісіз жыртқыш аң 15 қойды қырып кетті. Аудан әкімдігі бұл сілеусін деп болжам жасаған еді.
Шығыс Қазақстан облыстық Табиғи ресурстар және табиғат пайдалануды реттеу басқармасы орман және аңшылық шаруашылығы жедел әрекет ету жасағының мәліметінше, қораға түскен сілеусін емес, қасқыр болып шықты.
«Ауыл маңында қасқыр ізі байқалды. Жасақ қызметкерлері сол бойынша түз тағысының соңына түсті. Қаршанамен Көкжота төңірегін шарлап, ауылдан бірнеше шақырым жерден 4 қасқырды көрді. Қасқырлар түгелдей атып алынды», — делінген хабарламада.
