Шығыс Қазақстан облысында тендерді өз мердігеріне бермек болған «Самар-Вет» кәсіпорнының қызметкерлеріне қатысты тергеу басталды.
Әлеуметтік желіде Самар ауданындағы ветстансаның ықтимал мердігермен алдын ала сөз байласып, тендерді соған бермек болғаны жайлы ақпарат тарады.
Онда мемлекеттік сатып алудағы хабарландырудың ішінде «ерекше мәтін» жүргені жазылған.
«9 көлік үшін сақтандыру құны — 201 546 теңге. Техникалық сипаттамасы УАЗ 390945-330, LADA GRANTA SSANG YONG ACNOYON SPORT LADA 21214 LADA 21214 LADA 21214 LADA 21214 LADA 21214 LADA 21214. Болды, көліктер туралы басқа ештеңе қоспаңдар: мемлекеттік нөмірді де, шанақ нөмірін де, тіркеу нөмірін де. Әйтпесе, басқа сақтандырушылар көріп, Петропавлдың бір жерінен шыға келеді. Егер олар қоңырау шалып, көліктер немесе басқа нәрсе туралы сұрақ қойса, онда сатып алумен айналысатын маман орнында жоқ деп жауап бере салуға болады. Конкурсқа шығар алдында маған қоңырау шалыңдар. Шығар алдында екі күн бұрын болса жақсы. Мен өз адамдарыма ескертіп қою үшін. Егер бәрін мен жазғандай істесек, ойлағанымыз іске асады», — деп жазылған мәтінде.
Осыған байланысты ШҚО ауыл шаруашылығы басқармасы ресми мәлімдеме таратты.
«Самар-Вет» коммуналдық кәсіпорнының мемлекеттік сатып алуға шығарған хабарландыруы мониторинг кезінде анықталып, бірден алынып тасталды. Қызметтік тексеру басталып, материалдар құзырлы органдарға жіберілді. Тексеру қорытындысы бойынша кінәлі лауазымды тұлғалар заңға сәйкес қатаң жауапкершілікке тартылады. Сондай-ақ аудандағы ведомстволық бағынысты ұйымдардың басшылары мен мамандары сыбайлас жемқорлық тәуекелдеріне қатысты ішкі аудиттен өтеді», — дейді басқарма басшысының орынбасары Рамиль Сағандықов.
