2025 жылдың қаңтар–тамыз айларында Шу қаласында әлеуметтік-экономикалық даму қарқыны айтарлықтай артты. Қала басшылығының айтуынша, биылғы жыл – Шу үшін жаңа белес болмақ, деп хабарлайды Todayinfo.kz ақпараттық агенттігі.
Жолдар мен аялдамалар жаңарып жатыр
Қалада жалпы ұзындығы 204 шақырымды құрайтын 313 көше бар. Соңғы екі жылда 62 көше асфальтталса, 2025 жылы тағы 44 көшеге асфальт төселіп, қазан айына дейін толық аяқталады.
Исатай батыр көшесінде жаңа тротуар салынды, ойылған көшелер жамалып жатыр. Қаладағы 31 аялдаманың 15-і тозған – биыл олардың орнына жаңалары орнатылуда.
Қоғамдық көлік заманауи болып келеді
«Ақ жол-2000» компаниясы екі негізгі бағытта қалаішілік тасымалды жүзеге асырады. 2024 жылы сатып алынған 7 жаңа автобус қала тұрғындарына қызмет етіп жүр. Жол ақысы бұрынғыдай – 50 теңге.
Тұрғын үй мәселесі шешім табуда
2023 жылдан бері 200-ге жуық отбасы жаңа пәтерге ие болды. 2025 жылы тағы 114 пәтер тапсырылады. Қаладағы 10 көпқабатты үйге күрделі жөндеу жасалады.
Ауыз суға толық қосылу жолында
Бүгінде Шу халқының 75,6%-ы орталықтандырылған ауыз сумен қамтылған. «Қант зауыты» ауданындағы су жүйесі толық іске қосылды. «Жанкулиев», «Жайсан» және «Горгаз» аудандарында жұмыстар 60%-ға орындалды, жыл соңына дейін аяқталады.
Электр желілері мен жарықтандыру мәселесі шешілуде
Қаладағы электр желілерінің 70%-ы тозған. 2025 жылы 10 көшеге түнгі жарық шамдары орнатылады, электр бағаналары жаңартылады.
Қаланы абаттандыруға ерекше көңіл бөлінбек
Аумағы 10 гектар «Жеңіс» саябағы толық жаңғыртылып, қазан айында ашылады. Қант зауыты ауданында жаңа саябақ салынып жатыр. Сонымен қатар, қалаға кіреберісте 5 мың ағаш егілуде, 1600-і отырғызылды.
Шу вокзалы жаңа келбетке ие болмақ
1989 жылдан бері жөндеу көрмеген Шу вокзалына 3,4 млрд теңгеге күрделі жөндеу басталды. Ғимарат қана емес, алдындағы перрон мен абаттандыру жұмыстары да жаңартылады.
Қаланың тазалығы бақылауда
Қаладағы қоқыс алаңдары кезең-кезеңімен жаңартылып жатыр. 2025 жылы тағы 5 орын ретке келтіріледі. Бейберекет қоқыс тастаудың алдын алу үшін 23 бейнабақылау камерасы орнатылды.
Қоғамдық қолдау мен қайырымдылық
Кәсіпкерлердің демеушілігімен аз қамтылған отбасыларға азық-түлік, көмір мен ет өнімдері таратылды. «Таза қала» байқауы өткізіліп, белсенді тұрғындар марапатталды.
Қала әкімдігінің айтуынша, алдағы жылдан бастап абаттандыруға, аулаларды жаңартуға ерекше көңіл бөлінбек.
Фото: Шу қаласы әкімдігі
