Қазақстанға әлемнің 25 елінен 150-ге жуық журналист жиналмақ. Олар 3-6 наурызында Алматыда өтетін SCIJ (Халықаралық журналистердің шаңғы клубы) халықаралық клубының 69-шы отырысына қатысып, үш күн қатарынан өзара жарысқа түспек, деп хабарлайды Todayinfo агенттігі.
Клуб президенті қызметін канадалық Фредерик Уоллас, ал бас хатшы ретінде бельгиялық Бруно Шмиц атқарады. Клубтың негізін 1955 жылы саяси қайшылықтарды жеңу үшін спортты пайдалану идеясын ұсынған журналист және шаңғышы француз Жиль де Ла Рок қалаған.
Жыл сайын клуб мүшелері әлемнің әр елінде өзара жарыс өткізіп, кәсіби және саяси мәселелерді талқылау үшін жиналады. 2023 жылы бұл шара Канадада Marble Mountain шипажайында өтсе, 2024 жылы Алматыда «Шымбұлақ» тау курортында өтпек.
«Біз SCIJ халықаралық отырысын өткізу құқығын 2020 жылы жеңіп алдық. Бірақ пандемияға байланысты оны 2021 жылдан 2024 жылға ауыстыруға тура келді. Халықаралық клубтың қазақстандық филиалының журналистері шетелдегі әріптестерінің елімізде ерекше әсер алып кетуі үшін көп күш жұмсауда», — деді SCIJ Қазақстан президенті Ирина Баженова.
SCIJ (Халықаралық журналистердің шаңғы клубы) 31 ел мен үш континенттен үш мыңнан астам белсенді журналистерді біріктіреді.Кездесуде саяси және кәсіби тақырыптар талқыланады. Кездесу өткізген елдің жетістіктері, салт-дәстүрлері, мәдениеті мен ұлттық тағамдарымен танысады. Қысқасы, әр елдің журналистері бір-бірімен етене танысуға мүмкіндік алады.
Кездесудің басты себебі журналистер арасындағы тау және шаңғы жарысы болмақ. Кездесуді өткізудегі серіктестер «KazakhTourism» ұлттық компаниясы мен «Шымбұлақ» тау курорты.
SCIJ клубына Қазақстан 2013 жылы қабылданды, содан бері қатысушылар саны 45 адамға дейін өсті. Клубтың қазақстандық бөлімі халықаралық іс-шараларға қатысу және бұқаралық ақпарат құралдарында жариялау арқылы қысқы спорт түрлерін, еліміздің туристік әлеуетін және жетістіктерін белсенді түрде насихаттайды. Биыл елімізде бірінші рет өткізіліп жатқан жарыс шетелдік журналистер арқылы Қазақстанның туристік әлеуетін насихаттап, қазақтың салт-дәстүрін көрсетуге мүмкіндік болмақ.
