Елімізде 2019 жылдан бері жұмыс істейтін жастарға жалдамалы пәтер беріледі. Ұзақтығы 5 жыл. Бірақ жастардың жалға берілген пәтерді сатып алу құқығы жоқ,деп хабарлайды Todayinfo
Десе де 5 жыл бойы өз баспанасына ақша жинауға берілген үлкен мүмкіндік. Алайда пәтерлерді жалға алған шымкенттік жастар бүгінде ақша жинау мүмкін емес екенін айтып, тұрып жатқан үйлерін өздеріне бастапқы жарнамен сатуды сұраған еді,
«Жұмыс істейтін жастарға сатып алу құқығынсыз жалға берілетін тұрғын үй» бағдарламасы 2019 жылы іске қосылды. Бұл жоба Жастар жылы аясында 29 жасқа дейінгі отандастарымызды қолдау мақсатында іске қосылған болатын. Бұл бағдарлама еліміздің үш мегаполисінде, дәлірек айтқанда Астана, Алматы және Шымкент қалаларында іске асты.
Редакция жалдамалы үйде тұрып жатқан жастардың одан әрі тағдыры қалай болатынын білу үшін шымкент қаласының тұрғын үй басқармасына сауал жолдаған еді.
«Жұмыс істейтін жастарға сатып алу құқығынсыз берілетін тұрғынжайлар коммуналдық тұрғын үй қорынан тек ақылы түрде жалға беріледі. Бұл тұрғынжайларды жекешелендіруге заңды негіз жоқ», — делінген жауапта.
Аталған тұрғынжайлар бұрын 5 жыл мерзімге берілсе, 2023 жылдан бастап 3 жыл мерзімге жалға ұсынылады.
«Сонымен қатар, Шымкент қаласы әкімдігі тұрғындардан келіп түскен өтініштерге байланысты министрлікке жалдау мерзімін ұзарту немесе тұрғын үйді кейіннен несиеге алу мүмкіндігін қарастыру туралы ұсыныс жолдаған, алайда бұл ұсыныс қолдау таппады. Дегенмен, жалдау мерзімі аяқталғаннан кейін жастар «Қамқор» өңірлік бағдарламасы немесе «Отбасы банк» АҚ-ның «Наурыз» бағдарламасы аясында тұрғын үйді несиеге алу мүмкіндігіне ие болады», – делінген Шымкент қаласының тұрғын үй басқармасының ресми жауабында
